Ақтөбе облысы әкімі аппаратының қызметкері Нұрбақыт Барбосынов әкімшілік сотпен 15 күнге қамауға алынды. Мемлекеттік қызметкер ішімдік ішкен күйінде көлік басқарған, деп хабарлады paryz.kz, Arasha.kz-ке сілтеме жасап.
Мемлекеттік қызметкер ҚР Әкімшілік құқық бұзушылық туралы кодексінің 608-бабы 1-бөлігімен жауапқа тартылды. Ол 2021 жылдың 12 қаңтардағы сот қаулысымен 7 жылға көлік жүргізу құқығынан айырылды.
Іс материалдарына сүйенсек, Барбосынов 2021 жылдың 11 қаңтары күні сағат 21:30-да Ақтөбе қаласы, Пацаев көшесі, №4 үйге қарама-қарсы бетте "ВАЗ-21154" маркалы мемлекеттік тіркеу нөмірі Р 391 НО 18 автокөлігінің рөліне масаң халде отырған. Кінәсін мойындап, әкімшілік айыппұл түріндегі жаза қолдануды сұраған.
Облыс әкімдігі әкімшілік жазаға тартылған қызметкердің заңсыз әрекет жасардан 3 күн бұрын жұмыстан кетуге өз еркімен арыз жазғанын хабарлады.