«Бақытты отбасы» бағдарламасынан толық емес отбасы санаты алынып тасталды. Себебі кейінгі жылдары ажырасқандар саны көбейіп кеткен.
Бұл туралы бүгін Индустрия және инфрақұрылымдық даму министрлігі құрылыс және тұрғын үй-коммуналдық шаруашылық істері комитеті төрағасының орынбасары Бауыржан Қабдол мәлімдеді.
«Талдау нәтижесін ескеріп, отбасы институтын сақтау және ынталандыру үшін «Бақытты отбасы» бағдарламасынан толық емес отбасы санаты алынып тасталды. Сондай-ақ басым санаттар бойынша бірыңғай тәсіл қағидаты ескеріліп, жетім балалар, 1-2 топтағы мүгедектер енгізілді. Жүргізілген мониторинг «Бақытты отбасы» іске қосылған сәттен бастап, әкімдіктерде толық емес отбасы санаты бойынша кезекке тұрғындар саны 61,6 мың адамға (72%) артқанын көрсетті. Бұл басқа үй кезегінде тұрғандар үшін тең емес жағдай тудырды», - деді Бауыржан Қабдол.
Оның айтуынша, аталған бағдарлама бойынша өтініштердің 50 пайыздан астамы толық емес отбасылардан келіп түскен. Оның 35 пайызы жеңілдетілген қарыз алған.
Сондай-ақ комитет төрағасы 2019 жылы «Бақытты отбасы» іске қосылғаннан кейін елде ажырасу көрсеткіші күрт көбейгенін атап өтті.