Елімізде былтыр тіркеуге өтініш берген 9 партияның үшеуі құрылмақ

Елімізде жаңадан 3 партия құрылады. Оның бірі қазір Әділет министрлігінде тіркеліп жатса, тағы екеуі әлі партия съезін өткізу керек. Жалпы былтыр 9 бірдей саяси ұйым партия ретінде тіркелуге өтініш беріпті. Бірақ соның алтауының өтініші заң талабына сай емес деп кері қайтарылған, деп хабарлады КТК телеарнасы.

Әділет министрі Марат Бекетаевтың айтуынша, партияны тіркеу екі сатымен жүргізіледі. Алдымен ниеті болған саяси ұйым өтініш беруі керек. Егер барлығы заңға сай келсе, одан соң съезд өткізіп, қол жинайды. Қазіргі заң бойынша сапында 20 мың адам болуы шарт. Бірақ олардың арасында әскерилер, құқық қорғау органдарының қызметкерлері мен өзге ел азаматтары болмауы тиіс. Осындай талаптарға сай келмей қалғандардың бірі – El tiregi. Саяси ұйым жетекшісі Нұржан Әлтаев "әдейі тіркемей отыр" деп Әділет министрлігін сынаған еді. Ал министрліктің мәлімдеуінше, оның құрамында қайтыс болған адамдардың аты-жөні жүр. Содан арылсын деген ұстанымда. Әлтаевтың оппозициялық баламалы үкімет құрам деген мәлімдемесіне министр Бекетаев күмәнмен қарайтынын білдірді.

Тағы оқи отырыңыз: Nur Otan-нан шеттетілген Әлтаев бір ай ішінде оппозициялық үкімет құрмақ

"Егер қандай да бір партияның құрамында жақсы қаржыгер, заңгер, мықты мамандар болса, неге құрмасқа? Ал біздің көріп отырғанымыз "маған ақша берсең, мен осындай адамдарды тауып берем, сосын олар солай істейді" дегенге саяды. Одан гөрі, алдымен сондай адамдарды тауып, содан кейін қаржыландыруды сұраған дұрыс шығар? Олар тіпті ақша сұрамайтын да шығар", - деді Марат Бекетаев.