Роналдудың соққан голдары аты аңызға айналған Пеленікінен асып түсті

Португалиялық шабуылшы Криштиану Роналду соққан гол саны жөнінен Пелені басып озды, деп хабарлады ҚазАқпарат.

Италия чемпионатында "Ювентус" клубының намысын қорғап жүрген Роналду "Удинеземен" өткен матчта ресми ойындардағы 757-інші және 758-голдарын соқты. Криштиану лиссабондық "Спортинг", ағылшындық "Манчестер Юнайтед", мадридтік "Реал", туриндік "Ювентус" және Португалия құрамасы сапында барлығы 1032 матч өткізді.

Пеле 812 ресми ойында 757 гол соққан болатын. Голдар саны жөнінен абсолюттік рекорд - чехиялық шабуылшы Йозеф Бицанның еншісінде. Ол 1931-1955 жылдар аралығында 759 гол соққан екен. Ал Роналдудың бұл рекордты да жаңартатыны анық.

"Удинезені" 4:1 есебімен ұтқаннан кейін өткен жылғы чемпион "Ювентус" 27 ұпаймен Италия біріншілігінде әзірге 5-орында келеді. Жеңілістің ащы дәмін татпаған "Милан" клубы 37 ұпаймен жеке-дара көш бастап келеді.

Еске сала кетсек, бұдан бұрын Месси Пеленің рекордын жаңартып, бір клуб үшін соққан гол саны жөнінен Пеленің көрсеткішінен асып түскен болатын.