Таулы Қарабақтағы қақтығыстан 5 мыңға жуық адам қайтыс болған
"Ең алдымен оқ атуды тоқтату керек. Ымыраға келгенін қалаймын", - деді Ресей президенті.
Таулы Қарабақта жаңа қақтығыс басталғалы екі жақтан 5 мыңға жуық адам қайтыс болды. Бұл туралы Ресей президенті Владимир Путин "Валдай" талқылау клубында айтты, деп хабарлады РИА Новости.
"Екі жақтан да қайтыс болғандар көп. Біздің мәліметімізше, әр тараптан 2 мыңнан астам адам көз жұмған. Жалпы қайтыс болғандар саны 5 мыңға жетіп қалды", - деді Путин.
Айтуынша, Қарабақтағы жағдайды реттеу үшін екі тарап ымыраға келуі керек.
"Ең алдымен оқ атуды тоқтату керек. Ымыраға келгенін қалаймын. Мен президент Әлиевпен де, премьер-министр Пашинянмен де тығыз қарым-қатынас жасаймын. Олармен күніне бірнеше рет телефон арқылы сөйлесемін. Бірнеше рет", - деді Ресей президенті.
Еске салайық, 27 қыркүйекте таңертең Армения мен Әзербайжан арасындағы қақтығыс шиеленісті. Таулы Қарабақта соғыс жағдайы енгізілді. Армения да Қарабақтағы оқиғаларға байланысты әскери жағдай мен жалпы мобилизация жариялады.
