Алматыда дәмхананың бірінде қыздар пышақтасты
Алматыда дәмханада жанжал шығып, қыздардың бірі екіншісін пышақтаған. ҚазАқпараттың хабарлауынша, алдымен ақпарат әлеуметтік желіде тараған.
Жәбірленуші қыздың атынан айтылған оқиға Instagram-дағы пабликтердің бірінде жарияланды.
«Менің атым Бота. Қазір ауруханада пышақ жарақатымен жатырмын. 4 қыркүйекте жақын құрбыларым көп уақыттан бері дәмханаға жиналдық. Біраздан соң құрбым екеуміз сыртқа шықтық. Сол кезде 31 жастағы Айгерім Бақытжанқызын көрдік (лақап аты Айка-Мажор). Бір уақытта біз отырған кабинаға Айка Мажор келіп әңгімеге тартып, дауласа бастады. Мазамды алмауын сұрадым. Бірнеше секундтан соң арқамнан бірнеше рет пышақ салды. Қан ағып, құлап түстім», - делінген жазбада.
Белгілі болғандай, күдікті оқиға орнынан тайып тұрған, ал жәбірленуші ауыр халде ауруханаға жеткізілді. Қылмыс Медеу ауданындағы дәмханалардың бірінде болған.
«Күдікті ұсталды. Ұрыс кезінде 2 рет пышақ салған. Бұл дерек бойынша сот-медициналық сараптама тағайындалды. Соның нәтижесінде келтірілген жарақаттың ауырлығы анықталып, құқықтық баға беріледі», - деді қалалық Полиция департаментінің ресми өкілі Салтанат Әзірбек.
