Қорғаныс министрі Бектанов Арысқа байланысты қатаң сөгіс алған

Мемлекет басшысының жарлығымен Қорғаныс министрі болып тағайындалған Мұрат Бектанов бұған дейін қатаң сөгіс алған деп хабарлайды Paryz.kz.

ЭК сайтының жазуынша, 2019 жылы 24 маусымда Арыс қаласында әскери қоймадан өрт шығып, жарылыс болғанда оқиғаға жол берген қорғаныс саласының бірнеше басшысы жазаланған болатын. Президент Қасым-Жомарт Тоқаев 2019 жылдың 7 тамызында оларға қатаң сөгіс жариялады.

Лауазымды тұлғалар өзіне жүктелген міндеттерді тиісті деңгейде орындамаған және қару-жарақ пен оқ-дәрілердің қауіпсіздігін және сақталуын қамтамасыз ету жұмысында елеулі кемшіліктерге жол берген. Бұған қоса қару-жарақ пен оқ-дәрілерді сақтау нысандарын көшіру және орналастыру бағдарламасы тиісті деңгейде іске асырылмаған. Соның салдарынан Арыс қаласындағы әскери бөлімшедегі қару-жарақ жарылып, адам шығыны болды, — деген еді Мемлекет басшысы.

Тоқаевтың өкімімен бұрынғы Қорғаныс министрі Сәкен Жасұзақов Қазақстан Республикасының Қарулы күштері жүйесінен шығарылды.

Сондай-ақ, сол кездегі Қорғаныс министрінің бірінші орынбасары — Қазақстан Қарулы күштері бас штабының бастығы Мұрат Бектановқа, Қорғаныс министрінің бірінші орынбасары — Қазақстан Қарулы күштері бас штабының бастығы болып қызмет атқарған Мұрат Майкеевке, Қорғаныс министрінің орынбасары болып қызмет атқарған Талғат Жанжүменовке қатаң сөгіс жарияланды.

Оның алдында қызметінен босатылған Қорғаныс министрі Нұрлан Ермекбаевқа да қатаң сөгіс берілді.

Яғни сол кезде қатаң сөгіс алғандардың қатарында Мұрат Бектанов та болған. Енді Жамбыл облысының Байзақ ауданында орналасқан 28349 әскери бөлімі аумағындағы оқ-дәрі сақталатын базада жарылыстағы соң, ол министр болып тағайындалды. Соңғы мәліметтер бойынша жарылыстан 15 адам қаза тапқан.