Қостанайда зейнеткерлерге арналған университет ашылды
Сабаққа барлық ниет білдірген зейнеткер қатыса алады.
Қостанайда А.Байтұрсынов атындағы университет жанынан зейнеткерлерге арналған университет ашылды,деп хабарлады ҚазАқпарат.
Бұл туралы «Күміс университет» жобасының үйлестірушісі, А.Байтұрсынов атындағы ҚМУ-дың қашықтан оқыту және қосымша білім беру институтының директоры Азамат Жакеев айтты. ҚМУ-да «Күміс университет» жобасы іске қосылды. Ә.Жакеев айтып өткендей, бұл – әлеуметтік қызмет көрсетудің инновациялық түрі, ол өзін-өзі дамыту мақсатында егде жастағы азаматтарды оқытуды көздейді.
«Жобаны іске қосу кезінде біз 18 негізгі бағытты анықтадық. Бұл – компьютерлік сауаттылық, онда біз зейнеткерлерді әлеуметтік желілермен жұмыс істеуге және пайдалануға үйретеміз. Құқықтық, экономикалық, ветеринарлық, экологиялық, агрономиялық, психологиялық бағыттар бар, сондай-ақ тілдік курстар, философиялық бағыт, медиасауаттылық және басқалар бар. Оқу университет қабырғасында өтеді, курстарды ЖОО оқытушылары өткізеді. Сабақтар 15-і күні басталды», - деп атап өтті жоба үйлестірушісі.
Сабаққа барлық ниет білдірген зейнеткер қатыса алады. Олардың ең үлкені – 80 жаста.
«Қазір бізге зейнеткерлерден көптеген өтініштер түсіп жатыр. Егер жобаның басында тек 30-ға жуық адам оқуға ниет білдірген болса, бүгінде олардың саны 160-тан асты», - деп қосты А.Жакеев.
