"Рухани жаңғыру" істей алмағанды Жириновскийлер істеді" - журналист

"Мен Никонов, Федоров, Жириновскийге рахмет айтамын. Шын жүректен. Тура осылай жалғастыра беріңдер. Үлкен көмектерің тиіп жатыр бізге. Алғыс". Журналист Асхат Қасенғали өзінің facebook-тегі парақшасында осылай жазды, деп хабарлады paryz.kz.

"Бүгін түсте бір таныс жігіттермен түскі ас іштік. Арасында Ресей десе ішкен асын жерге қоятын, "Ресей бізді батыстан да, Қытайдан да қорғайды" деп жүрген бір досымыз бар. Сол өзгеріп кетіпті. "Никонов айтқандай, солтүстікті алып алса қайтеміз?" дейді. "Ей, сен Ресей десе өліп-өшіп тұратын едің ғой" десек, сәл өзі ұялыңқырап қалды. Ойы өзгеріпті. Қанша кездесу, қанша басқосуда осы тақырыпта пікірталас жасадық, ойын мүлде өзгертпейтін. Енді соның ойын Никонов, Федоровтар өзгерткеніне қайран қалдым", - дейді ол.

Журналист аталған үш шовиниске сол үшін де алғыс айтады.

"Рухани жаңғыру", түрлі форумдар мен басқосулар, 31 мамыр жасай алмағанды осы үшеуі жасады. Біраз қазақ "Ресей бізді қолдап, қорғайды" деген жалаң түсініктен арылды. Осы үшеуі біздің ұлт ретінде ұйыса түсуімізге сеп болды, оны өздері де түсінбейтін сияқты. Меңдуана жегір Никонов, Федоров, Жирик. Рахмет!" деп жазды журналист.