"Бір депутатты асырау үшін мемлекет жылына 92 млн теңге жұмсайды" - Санжар Боқаев

Бұл туралы "ҚазТрансГаз" басқарма төрағасының бұрынғы кеңесшісі Санжар Боқаев Facebook-тегі парақшасына жазды, деп хабарлады paryz.kz.

"Бір депутатты асырау үшін мемлекет жылына 92 млн теңге жұмсайды. Ойлап көріңізші, 78 адамнан тұратын біздің команда жыл бойы 5000 шаршы метр өндіріс алаңында жұмыс істеп, мыңнан астам тапсырыс орындады. Жұмысты көп істедік, бірақ, бір депутатты асырай алмадық. Осындайда Салтыков-Щедриннің повесіндегі бір еркектің екі генералды асырағаны еске түседі. Ұят-ты, менің тіпті бір депутатты асырауға шамам жетпеді", - деді С. Боқаев.

Оның айтуынша, мемлекеттің тиімділігі аз екені осындайда көрінеді. Салыстырмалы түрде алсақ, егер жеке компания жоғары жалақымен көптеген әкімшілік қызметкерді жұмысқа алса, бизнес бір айға да шыдамайды.

"Парламент депутаттары S-класты мерседестерден бас тартса дейсің. Осы шешімнің өзі жыл сайын 1 млрд теңгеден астам қаржы үнемдеуге мүмкіндік берер еді. Менің ойымша, олар қызметтік көліктен бас тартып, өз көліктерімен жүрсе, ештеңесі кетпейді. Вашингтон мен Нью-Йорктің метросынан Ақ үй мен Конгрестің біздің депутаттардан да салмақты шенділерін кездестіргенмін.

Мәжіліс пен Сенаттағы түкке пайдасы жоқ персоналдар мен көптеген көмекшілерден бас тартып, материалдық-техникалық қамтамасыз ету жағын да батыл оңтайландыруға болар еді. Осылардың бәрі депутаттардың толыққанды жұмыс істеуіне жағдай жасау үшін құрылған. Ал енді депутаттар толыққанды жұмыс істеп жатыр ма, жоқ па, оны қазақстандықтар айтсын", - деді одан әрі Санжар Боқаев.

Ал өзі "бір депутатты асырау үшін" енді бұдан да көп әрі жақсы жұмыс істеуге "уәде беріп" отыр.