Үкімет қашан отставкаға кетеді? Вице-премьер жауап берді
Соңғы кезде атқарушы биліктің жұмысына халықтың көңілі толмайды.
Премьер-министрдің орынбасары Ералы Тоғжанов Үкімет қашан отставкаға кетеді деген сұраққа жауап берді. Cөзіне қарағанда, оның атқарылып жатқан шаруаларға көңілі толады екен деп хабарлайды Paryz.kz, КТК телеарнасына сілтеме жасап.
Жұмыспен қамтуға байланысты жоспардың толық орындалуын көрдіңіздер. Эпидахуалға қатысты жағдайдың бәрін көріп жатсыздар. Сондықтан, Құдайға шүкір. Мұны жасалынып жатқан үлкен жұмыстардың нақты нәтижесі деп қарастыру керек. Оның бағасын Президент береді, халық береді, – дейді вице-премьер Ералы Тоғжанов.
Үкіметтің отставкасы туралы өткен аптадан бері айтылып жүр. Мәжілістің отырысынан кейін тілшілер мұны Премьер-министр Асқар Маминнің өзінен сұрап көрмек болған. Алайда Үкімет басшысы қаша жөнелді.
Соңғы кезде атқарушы биліктің жұмысына халықтың көңілі толмайды. Жанармай, азық-түлік пен тұрғын үй құнының тоқтаусыз өсуі қазір өзекті. Ал Мамин бастаған Министрлер кабинеті мұнымен қалай күреседі, оның барлығы жабулы қазан күйінде.
Айта кетейік, қыркүйек айында Президент Қасым-Жомарт Тоқаев халыққа Жолдауында өз міндетін орындай алмағандардың орынтағынан кетуін сұраған-ды.
