Елордалық полицейлер спорт кешенінен бомба іздеді

ҚазАқпараттың хабарлауынша, белгісіз адам ұялы телефонмен «112» нөміріне хабарласып, «Алатау» спорт кешені маңына бомба қойылғанын айтқан. Осыдан кейін кинологтар мен жарылыстехниктері спорт кешенінің ғимаратын, сол маңайды тінтіп шыққанымен, бомба табылған жоқ.

«Жедел-іздестіру шаралары барысында терроризм актісі туралы хабарлаған 39 жастағы ер адам ұсталды. Ол ішімдікке мас күйде болған. Тергеу барысында күдікті бұған дейін бірнеше рет ұрлық, алаяқтық және есірткі заттарын сақтағаны үшін қылмыстық жауапкершілікке тартылғаны анықталды. Күдікті ұсталып, Полиция департаментінің уақытша оқшаулағышына қамалды. Аталған факті бойынша ҚР ҚК 273-бабымен тергеу жүріп жатыр», - делінген ақпаратта.

 Полиция департаменті  қала қонақтары мен тұрғындарына терроризм туралы жалған хабарландыру қылмыстық жауапкершілікке түрткі болатындығын ескертіп отыр. Жыл басынан бері астанада терроризм актісі туралы 6 жалған хабарлама тіркелді. Полиция қызметкерлері қылмысты жасағандардың барлығын ұстады. Көп жағдайда мұндай жалған хабарды кәмелетке толмағандар мен мас адамдардың жасайтындығы анықталған.