Алматыда 18 жастағы жігіт туған әжесін өлтіріп, үйін өртеп жіберген

Оқиға 2020 жылғы 9 қарашада Алматы қаласы Медеу ауданы шағынаудандарының бірінде болған.

«Өртеніп кеткен үй орнынан қарт әйелдің мәйітіне жүргізілген сот-медициналық сараптама оның өлімі электр тогы соққаннан пайда болған өткір жүрек-қан тамыр және тыныс алу жеткіліксіздігінің салдарынан болғанын көрсетті. Өрттің себебі сот-өрт-техникалық сараптамасының қорытындысына сәйкес ұзартқыштың электр сымы жұмысындағы ақаудан туындаған деп көрсетілген. Аталған сот сараптамаларының нәтижелерін ескере отырып, қылмыстық құқықбұзушылық құрамының болмауына байланысты сотқа дейінгі тергеп-тексеру тоқтатылған болатын», – деп жазады прокуратураның баспасөз қызметі.

Алайда әйелдің туыстары қайғылы оқиғаның себебіне күмәнмен қарап, біршама уақыт өткен соң қылмыстық іс материалдарын қайта қарау туралы өтініш жазады. Қайтыс болған адамның туыстарының уәжін бағалай келе, Медеу ауданының прокуратурасы аталған іс бойынша қосымша тергеу жұмыстарын қолға алады.

Құзырлы органның нұсқауы бойынша мәйітке эксгумация жүргізілді және комиссиялық сот-медициналық сараптама тағайындалды, бірқатар басқа тергеу әрекеттері жүргізілді. Қосымша сараптаманың қорытындысы бойынша өлімнің себебі қасақана тұншықтырудан болғаны анықталды.

«Қайтыс болған адамның 18 жастағы немересі қасақана кісі өлтірді деген күдікке ілінді. Ол сол күні отбасылық жанжалдан соң дене жарақатын алып, содан кейін әжесін өлтіргенін мойындады. Жас жігіт үйде болған ақша мен зергерлік бұйымдарды иемденіп, қылмыс ізін жасыру үшін үйге әдейі өрт қойған.

ЙАлматы қаласының қылмыстық істер жөніндегі мамандандырылған ауданаралық сотының үкімімен сотталушы кісі өлтіргені, сондай-ақ мүлкін ұрлағаны үшін кінәлі деп танылып, 12 жыл 6 ай мерзімге бас бостандығынан айырылды (үкім заңды күшіне енбеді)», – делінген хабарламада.