Жетісу облысында кәмелетке толмаған қызды зорлап, өлтіріп кеткен

Өткен аптада оқушының ата-анасы қызының құрбысының үйіне кетіп, содан қайта оралмағанын айтып полицияға хабарласқан.

Полиция жоғалған қызды іздестіру бойынша жан-жақты жұмыс жүргізіп, жедел уәкілдер күдіктіні анықтады.

“Қызбен жыныстық қатынасқа түсіп, мұнысы елге аян болады деп қорыққандықтан оны өлтіргенін мойындаған жергілікті тұрғын анықталды”, – деді Жетісу облыстық полиция департаментінің баспасөз қызметі.

Ол қыздың денесін ауылдың шетіне көміпті. Мәйіт топырақ астынан алынып, сот-медициналық сараптама жүргізуге жолданды.

“ҚР ҚК 99-бабы 2-бөлігі 3-тармағы (Айыптының дәрменсіз күйдегі адамды өлтіруі), 10-тармағы (өзге қылмысты жасыру мақсатында) және 14-тармағы (Кәмелетке толмағанды өлтіру) бойынша қылмыстық іс тіркелді, олар бойынша өмір бойына бас бостандығынан айыруға дейін жаза қарастырылған. Ал ҚР ҚК-ның 120-бабы 3-1-бөлігі (Кәмелетке толмаған адамды зорлау) 17 жылға дейін бас бостандығынан айыруды көздейді”, – деді Жетісу облыстық полиция департаментінің баспасөз қызметі.

Күдікті УҰИ-ға қамауға алынды, іс бойынша бірқатар қажетті сараптамалар тағайындалды.

Тергеуді облыстық полиция департаментінің тергеушілері жүргізеді.