"Ажырасқан екенін пайдаланған": Қостанай тұрғыны әйелдерді төрт миллион теңгеге алдап кеткен

Қостанайлық ер адам жалғызбасты әйелдерді алдап, төрт миллион теңге қаражаттарын алып кеткен. Жігіт өзінің құрбандарын танысу сайттарынан іздеген. Төрт әйел алаяқтың құрығына түсті, деп хабарлайды Paryz.kz, Stan.kz-ке сілтеме жасап.

Сурет: ашық дереккөз

Полицейлердің айтуынша, күдікті ажырасқан әйелдермен сайттарда танысқан. Ол сезім білдіріп, артынша арзан бағада пәтер алуға көмектесемін деп алдаған. Әйелдер арзан пәтер алуға тез келіскен. Ер адам кездесу ұйымдастырып, сатып алушыға құжаттарды беріп, аванстық төлем жасау қажеттігін айтқан. Ақшаны алғаннан кейін жігіт жоғалып кетті.

Алданған әйелдер полицияға арыз жазып, кейін алаяқ ұсталды.

"Әйелдер көбінесе жалғыз қалмау үшін ер адамдармен қарым-қатынас орнатады. Бұл жерде алаяқ олардың ажырасқан, бойдақ екенін пайдаланған. Ол алаяқтық бойынша тергелуде”, - деді Қостанай облысы бойынша қылмыстық іздестіру басқармасының анықтаушысы Нина Ахмадеева.