Мәжіліс депутаттары Оралдағы әлеуметтік нысандар құрылысымен танысты

​Мәжілісімендер Ескі әуежай ауданындағы Светлая көшесін жөндеу жұмыстарына жақсы баға берді. Жалпы ұзындығы 1495 метр болатын жолдың бүгінде 450 метрі жаңа кейіпке енген. Жұмыс кестеге сай жүріп жатыр.

​"Нұрлы жер" бағдарламасы бойынша «Отбасы банк» салымшылары үшін салынып жатқан 9 қабатты 104 пәтерлі түрғын үй де депутаттардың көңілінен шықты. Жыл соңына қарай аяқтау жоспарланып отырған бұл үйдің астынғы қабатында әлеуметтік нысандар орналаспақшы. 

​Одан кейін Еткомбинаты ауданындағы №33 мектеп ғимаратының құрылысымен танысты. Құрылыс жұмыстарына 1 млрд 165 млн теңге бөлінген білім ұясын алдағы қараша айында толықтай аяқтау жоспарда бар.

​-Біздің мектептің негізі 1935 жылы қаланды. 2016 жылы ғимарат апатты деп танылған соң, жаңа мектеп салына бастады. Жоба бойынша мектеп 3 корпустан тұрады. Онда cooking-club, смарт кабинет, технопарк, интеллектуальдық бұрыштар, конференц-зал, спортзал, акт зал, асхана болады,-деді аталмыш мектеп директоры Үміт Ерғалиева.

Осынау инспекциялау іс-шарасы соңында жергілікті БАҚ өкілдеріне сұхбат берген мәжілісмендер құрылысшылар тарапынан біраз мәселе көтеріліп, ұсыныс-пікір айтылғанын мәлімдеді. Соған орай олар алдағы уақытта бұл бағыттарда нақты шаралар алынуы үшін Үкіметке сауал жолдамақшы.

Жұбан МҰРАТ,

Орал қаласы