Қақпа алдындағы кездесу

Бұл іс-шара Орал қалалық ішкі саясат бөлімінің «Қоғамда сыбайлас жемқорлыққа қарсы мәдениетті және құқық бұзушылыққа қарсы «нөлдік төзбеушілік» қағидатын қалыптастыруға бағытталған шараларды ұйымдастыру және өткізу» әлеуметтік тапсырысы аясында жүзеге асырылды. Ұйымдастырушылар бұл дәрісті Қазақстан Республикасы Ішкі істер министрлігі қылмыстық-атқару жүйесі комитетінің «РУ-170/2» республикалық мемлекеттік мекемесімен бірлесе өткізді. Дәріс барысында сотталушылармен әңгімелесу, сұрақ-жауаптар жүргізіліп, олардың көкейлерінде жүрген сауалдарға жауаптар берілді. Жазасын өтеушіге қысқа мерзімді кәсіптік білім алып, жаңа мамандықты меңгеруге, жұмысқа орналасуға, денсаулығы мен әлеуметтік жағдайына байланысты тиісті көмектер алуға құқығы бар екені, сонымен қатар жеке кәсібін ашуға мемлекет тарапынан қолдау көрсетілетіні айтылды. Жиын соңында қатысушылар өтініштерін жеткізіп, мұндай дәрістерді жүйелі түрде өткізуге ұсыныс білдірді.

Жалпы «Қақпа алдындағы кездесу» жобасының мақсаты – сотталғандарды әлеуметтік бейімдеу, қылмыстың қайталануын болдырмаудың алдын алу мәселелері, психологиялық, әлеуметтік байланыстар орнату, кәсіби білім алу, біліктілігін арттыру, жұмыспен қамту бағыттарын қамтиды. Психологиялық дәрісті жоғары санатты психолог Гүлнәр Кабулова жүргізді. «Қақпа алдындағы кездесу» әлеуметтік іс-шарасы алдағы уақытта да жалғасын табады.

Томирис СҰЛТАН