Түркістан облысында 200 миллион теңгеге салынған мектеп құлайын деп тұр

Түркістан облысында балалар мен ата-аналар жергілікті әкімдікке шағымданып отыр. Олардың айтуынша, апатты жағдайда тұрған мектеп 1 қыркүйек жақындаса да, әлі жөнделмеген деп хабарлайды Stan.kz, 31 арнаның "Информбюро" бағдарламасына сілтеме жасап. 

Бұл білім мекемесінің салынғанына небәрі 10 жыл болғанына қарамастан, едені түсіп, қабырғасы үгіліп, үлкен жырықтар пайда болған. 

Мектепке бірінші қыркүйекте 130 оқушы білім алатын болады. Алайда, мектептің бұл жағдайы ата-аналарды алаңдатып отыр. 

Тағы оқи отырыңыз: Түркістан облысында зияткерлік мектеп ашқан әйелдің бизнесін тартып алған

Қараңызшы, іргетас сыртынан қалай көрінеді, терең жарықтар бар! Дәл осындай жарықтар ғимарат ішінде де бар. Біздің балалар мұндай мектепте қалай білім алады, бұл өте қауіпті, – дейді ауыл тұрғыны Жандос Құттыметов. 

10 жыл бұрын мектепті 200 миллион теңгеге салған мердігер енді оның жұмысының сапасына жауап бермейді. Барлық кепілдік мерзімі аяқталды. Мектеп 150 оқушыға арналған. Бірақ ата-аналар балаларын бұл мектепке жіберуге қорқады. 

Біз балаларды мектепке жіберуге қорқамыз. Біз қазірдің өзінде әкімдіктегілерге шағымдандық. Олар жөндеу жұмыстарын жүргіземіз деп уәде берді. Бірақ қашан жөндейтіндері белгісіз, – дейді тұрғындардың бірі Тастан Қуатбеков. 

Аудандық білім бөлімінің өкілдері бәрі ата-аналар суреттегендей қорқынышты емес деп сендіреді. 

Қабырғалардағы жарықтар 10 сантиметрге дейін, бірінші қабаттың жері қисайып кеткен, плиткалар жарылған, атап айтқанда олқылықтар тек қана асханада бар. Мұның бәрі техникалық сараптама кезінде расталды. Біз мектептің күрделі жөндеуін жүргізу үшін жобалық сметалық құжаттарды дайындауға 6 миллион 939 мың теңге бөлу туралы шешім қабылдадық және облыстық әкімдікке тиісті хаттар жібердік, – дейді Төлеби ауданының адами даму бөлімінің маманы Пернебек Асанов. 

Бірақ ақша бөлуге, құжаттарды дайындауға және жөндеу жұмыстарын жүргізуге уақыт қажет. Аудандық білім бөлімі 2022 жылы мектеп толық жөндеуден өтетініне уәде берді.