"Жалақы аз!": Шетелде тұратын қазақстандықтар елді неге тастап кеткендерін жасырмады

Aibat_kz жаңалықтар қызметі шетел асқан қазақстандықтардан көшу себебін және нені қатты сағынатынын сұрады деп хабарлайды Paryz.kz. 

Милана Литвинованың Канадада тұрып жатқанына бес жыл болды. Айтуынша, Қазақстандағы жалақы деңгейі оның көңілінен шықпаған.

Қазақстан мен Канададағы табыстың деңгейі жер мен көктей. Менің мақсаттарым жоғары, сол себепті Қазақстанда мен істейтін ештеңе жоқ. Мен қалайтын табысты Қазақстанда табу мүмкін емес, - деп түсіндірді ол.

Ол Канадада қиын жағдайға тап болсаң, мемлекет бірден қаржылай қолдау көрсететінін атап өтті.

Бойжеткен Қазақстанның қазіргі проблемаларды шешуге көбірек назар аударғанын қалайтынын айтты.

Ал соңғы бес жылда Оңтүстік Кореяда тұрып жатқан Жанерке Бегалы да елден жалақының төмендігіне байланысты кеткен.

Бұл жерде орташа жалақы 1 800 доллар шамасында. Бұл - ең төмені. Ал ең көбі 10 мың доллардан асады, – деді ол.

Ангелина Ларина Чехияда алты жыл тұрады. Айтуынша, Қазақстанмен салыстырғанда мұнда жұмыссыздық деңгейі өте төмен.

Бұл жерде ешкім сені төмендетпейді. Мәселен, даяшы болып істесең, «фу, официант» деп айтпайды. Өйткені жақсы даяшының ақшасы да жақсы, - деді ол.

Сондай-ақ Ларина Еуропада өзін қауіпсіз сезінетінін айтты.

Қазақстанда өзімді олай сезінбеп едім. Мұны немен байланыстыратынымды білмеймін. Мүмкін менталитетке байланысты шығар, - дейді ол.

Десе де Ларина Қазақстанды қатты сағынғанын жасырмады.

Азат Шаймердинов Польшаға бір ай бұрын ғана көшкен.

Жеміс-жидегі, көкөнісі өте дәмді, ол жағынан проблема жоқ. Бірақ ет аздау. Мен нағыз қазақ сияқты етті жақсы көремін. Ал бұл жерде жылқы етін таба алмайсың, тапсаң да, өте қымбат тұрады, – дейді ол.

Григорий Мелкунов Израильде бес жыл тұрады. Жас жігіт медициналық көмектің артықшылығын атады.

Өзіңе ыңғайлы уақытта дәрігерге кезекке тұру, анализ тапсыру өте оңай. Егер дәрігер дәрі жазып, сол қағазбен дәріханаға барсаң, саған 70 процент жеңілдік дасайды. Дәріні тиын-тебенге сатып аласың, - дейді ол.

Григорий Қазақстанға еш шағымы жоқ екенін айтты.

Айта кетейік, биылғы бес айы ішінде Қазақстаннан 9 862 адам көшіп кеткен. Елге келгендер саны – небәрі 3 662 адам.