«Екпе алып, денсаулығымызды сақтайық»

Орал қаласында қазіргі уақытта індетке қарсы екпе алуға белсенділік танытқандар қатары көбейді. Ағымдағы жылдың 1 ақпанынан бастау алған науқан бойынша бүгінге дейін 215 461 адам вакцинаның бірінші компонентін алған. 42 056 тұрғын – екінші компонентпен егілді.

Екпе алғандардың бірі Гүламан Исмағұлова есімда қала тұрғыны. Қалалық полиция басқармасында қызмет жасайтын ол COVID-19-дың алдын алу және онымен күресудің бірден-бір жолы вакцина алудың маңызы туралы пікірін жеткізіп, жерлестерін індетті бірлесе жеңуге шақырды.

  – Орал қаласы Полиция басқармасының жеке құрамы, өзім де вакцина алдым. Мекен-жайым бойынша №5 емханаға барып, кезекке тұрып, «QazCovid-in» вакцинасын алып қайттым. Бұл ең бірінші жеке басымыздың денсаулығын сақтаудың алғашқы қадамы. Одан әрі отбасы, үйдегі бала-шағамыздың дін амандығы. Менімен қатар қызмет ететін жастар да аяқтай келіп, вакцина алды. Мемлекет тарапынан денсаулықты сақтау іс-шаралары қарқын алды. Екпе алып, денсаулығымызды сақтайық. Ұрпақтарымыздың жақсы өмірі үшін ата-бабаларымыз өмір бойы күресті. Біз де бала-шағымыздың қамы, бақытты болашағы үшін өмір сүрейік, – дейді Гүламан Исмағұлова.

Санитариялық-эпидемиологиялық мамандардың мәлімдеуінше, қазіргі уақытта облыста Спутник-V, QazVac, Hayat-Vax, QazCovid-in вакциналары бар. Қала бойынша 30 екпе егу пункті жұмыс жасауда. «City Center» сауда орталығының алдында жылжымалы егу пункті күн сайын қызмет көрсетеді. 

Томирис СҰЛТАН