Петропавлдық полицейлер жерлеу рәсімінің өкілдеріне өлім-жітім туралы ақпарат сатқан

Пандемия кезінде полиция қызметкерлері Солтүстік Қазақстан облысында қаза тапқандар туралы ақпаратты сатуда, деп хабарлады paryz.kz, "Астана" телеарнасына сілтеме жасап.

Істің егжей-тегжейін сыбайлас жемқорлыққа қарсы күрес мекемесі жариялады. Жерлеу агенттіктерінің қызметкерлері қайтыс болған адамның үйіне жедел жәрдем мен полициядан да бұрын келіп отырған.

"Пандемияға дейін де менің әкем қайтыс болған кезде полиция шақырдық. 10 минуттан кейін есік қағылды. Есікті ашсақ, полиция қызметкерлерінен бұрын ғұрыптық агенттіктің адамдары келіп тұр", "Иә, ылғи да солай. Полициядан бұрын мәйітхана қызметкерлері жетеді", "Күйеуімнің қайтыс болғаны туралы полицияға қоңырау шалдым, 5 минут өтпей ғұрыптық агенттік қызметкерлері келіп, мәйітті мәйітханаға алып кетуді ұсынды. Ал полицейлер сараптаманы тағы бір жарым сағат күттірді" деп жазып жатыр қала тұрғындары әлеуметтік желілерде.

Марқұмның туыстары рәсімдік агенттіктер адамдардың өлімі туралы қалай тез біліп үлгереді деп таңдануда. Антикор қызметкерлері барлық ақпарат полицияның жедел тіркеу орталығы арқылы өтетіндігін түсіндірді. Бұл жөнінде ақпаратқа қолы жетімді полиция қызметкерлері деректерді сатумен айналысқан деп болжануда. Кейбір мәліметтер бойынша, Петропавлдағы жерлеу қызметі бюросының бір өкілі жедел кезекшіге 200 мың теңгеден астам ақша төлеген. Жерлеу агенттігі бұл ақпаратты мойындамады.

"Мұның бәрі шындыққа сәйкес келмейді. Біздің қызмет көрсетіп жүргенімізге 20 жылдан асты, адамдар бізді өздері шақырады. Біз полициямен де, жедел жәрдеммен де жұмыс істемейміз. Бізге әлеуметтік жарнама мен өз клиенттеріміз жеткілікті", - деді жерлеу бюросының директоры Вадим Приходченко.

Дегенмен сыбайлас жемқорлыққа қарсы іс-қимыл агенттігі полиция қызметкерлерінің, тіпті, өздері белгілеген баға – бір марқұм үшін 4 мың теңге болғанын айтады.

"Петропавлдағы полицияның жедел басқару орталығы қызметкерлеріне қатысты сотқа дейінгі тергеу басталды. Олар Петропавлда ғибадат мекемелеріне 4 мың теңге мөлшеріндегі сыйақыға қайтыс болған адамның жеке деректері мен олар туралы ақпарат берді деп күдіктелуде", - деді ШҚО сыбайлас жемқорлыққа қарсы іс-қимыл департаменті басшысының орынбасары Нұрлан Жахин.

Полиция департаменті бұл факт бойынша тергеу басталғанын хабарлады.