«Балаға электрошокер қолданып, ине шанышқан»: Атыраудағы әскери мектептен шу шықты

Оқушылардың айтуынша, оларды әлденеше рет ұрып-соғып, электрошокер қолданып, пышақпен қорқытқан.

«Бұл жағдай туралы жәбірленушілердің бірінің анасы Нұргүл Еспосынова әлеуметтік желіде баяндап берді. Ол кейінгі оқиғалардың бірі 4 желтоқсанда болғанын нақтылады. Сол күннен бері ұлының денесінде әлі күнге дейін соққы іздері қалып қойған. Жарақаттанған жерлерді байқаған соң, мұның қалай болғанын білу үшін оқу орнына бардым. Бірақ директор да, мұғалім де болмады. Біраз уақыттан кейін баламның мектептен шығарылғанын білдім, – дейді Нұргүл Еспосынова. 

Айтуынша, ол қазаннан бастап баласының мектепке барғысы келмей жүргенін байқаған.

«Ата-аналарға «балаларыңызға мектепте қонуға болады» деген хабарлама келген еді. Бірақ балам қалғысы келмейтінін айтты. Ал мектептен шығарылуына келсек, «ол насыбай қолданған» деп хабарлады. Кейін үшінші тұлғалардан білгенімдей, насыбай баланың қалтасынан табылды деп отыр. Бірақ бұған куәгерлер жоқ. Мен бұл істің жиналыста қаралғанын білмедім, оның үстіне ата-аналардың қатысуынсыз жиналыста оны мектептен шығару туралы шешім қабылданған. Өзінің кінәсіз екенін дәлелдеу үшін балам анализдер тапсырды. Ешқандай зат табылмағаны туралы қорытынды қолымызда. Бұл туралы сынып жетекшісіне де айттым. Бірақ баламды бәрібір оқудан шығарып жіберді. «Неге баланы оқудан шығарасыздар?» деп сұрағанда, жауап бермеді. Директордың іссапарда екенін айтты. Қазір балам үйде оқусыз отыр, екі рет «мектептен құжаттарды алып кетіңіз» деп жазыпты. Бірақ мен құжаттарды алудан бас тарттым, себебі балам кінәлі емес. Полицейлер мен білім беру басқармасына арыз жаздым, бірақ еш көмек болмады. Сосын амалсыздан Analarga Komek Qoldaw ҚБ жетекшісі Сандуғаш Кукеноваға жүгіндім. Балаларым жақсы оқиды, тәртіптері жақсы. Егер балам шынымен тәртіпсіз болса, мектепке барып жүрмес едім», - дейді шарасыз ана.

Сондай-ақ ол балаларға электрошокер қолданылатын дәлелдерді алға тартып отыр.

«Балама электрошокер қолданған, кеуде тұсынан ұрған, пышақ тигізген, ине шанышқан. Баламның денесінде пышақтың ізі әлі көрініп тұр», - дейді Нұргүл Еспосынова. 

Сондай-ақ наразы болған өзге ата-аналар да мектепті жан-жақты тексеріп, кінәлілерді жазалауды талап етті. Басылым түсініктеме алу үшін облыстық білім басқармасының баспасөз қызметіне жүгінген. 

Олардың мәліметінше, Атырау облысындағы «Сармат» мамандандырылған мектеп-лицей-интернатында мекеме мен ата-аналар арасында келісім жасалған. Бүгінде Атыраудағы «Сармат» мамандандырылған мектеп-лицей интернатында 236 оқушы білім алады. 39 мұғалім, 19 тәрбиеші қызмет атқарады. Ата-аналармен арада өзара қол қойылған келісім бар. Бұл оқушы мектепте бірнеше рет тәртіпсіздік жасаған. Ата-анасына ескертілген. Бала мектепішілік есепке алынған. 2024 жылғы қыркүйекте бала тәртіпсіздік жасап, ескертумен мектепте қалдырылған. Желтоқсанда тәртіпсіздік қайталанған соң ата-анасы шақырылады. Олар келмейді. Бала 9 желтоқсанда педагогикалық кеңестің шешімімен мектептен шығарылды, - деп хабарлады облыстық білім басқармасының баспасөз қызметі. 

Қазір ата-ананың арызы бойынша тергеу амалдары жүргізіліп жатыр. Білім беру басқармасы оқу-тәрбие процесінің ұйымдастырылуы бойынша зерделеу жұмыстарын өткізді. Оқушыға психологиялық көмек көрсетіледі.