«Әкем мені көп ұрды»: Танымал блогер бала кезінде көрген қорлығын айтты

Блогер Сәбина бала кезінде көп таяқ жегені туралы «Taboo» подкастында баяндады.

«Менің әкем өте сұлу жігіт болды. Туған-туыстан бастап, көршілерге дейін әкемнің келбетіне қызығатын. Мен 10 жасқа толғанда екеуі ажырасып кетті. Әкем мені өте көп ұратын. Оның түсінігінде қыз баланы ұрып тәрбиелеу керек екен. Кішкентай кезімде үйде дүкен болды. Сатып алушылар балмұздақ алса, маған да біреуін ұстатып кететін. Мен баламын ғой, қатты қуанып күлсем, әкем қолындағы затын жіберіп қалатын. Анам көріп тұрып аяйтын. Қазір екі інім «неге біз сол кезде әкемізге қой демедік» деп өкінеді. Бауырларыма әкемнің қолының ұшы да тиген емес. Ақыры анам бөлек тұрамын деп шешім қабылдады. Әкем мені ұра бергесін, анам да шаршап кетті. «Бұл қыз ертең мынадай соққыдан құтылу үшін ертерек тұрмысқа шығып кетеді” деп айтты. Содан екеуі бөлек кетті. Әкемді ешқашанда жамандаған емеспін. Олар ажырасқанда дүниені түгел әкем алып қалды. Анам ол үйден үш баласымен ғана кетті. Тіпті, туысқандар теріс айналып, жиын-тойларға анамды қоспайтын. «Олардың түгі жоқ, дымсыз қалды» деген әңгімені де естідік. Дәл қазіргі танымал болуымның себебі анамды көтеру болды. Еңсесінің түспегенін қаладым. Сол арманыма жеттім. Ақтөбеде жеке мейрамханамыз жұмыс істейді. Сол жерге «Сәбинаның анасы» деп мамамды іздеп келетіндер де бар екен. Анам да сәл жетістікке жетіп, ісі оңға басса, «Сенің арқаң» деп маған алғыс айтып отырады», – деді желі жұлдызы.