СҚО-да хат танымайтын және құжаты жоқ ана мен бала табылды
Қазір оларға медициналық, психологиялық және құқықтық көмек көрсетіліп жатыр, - деп хабарлайды Tengrinews.kz, СҚО ПД баспасөз қызметіне сілтеме жасап.
Баспасөз қызметінің мәліметінше, Солтүстік Қазақстан облысында фермерлік шаруашылықтың бірінен 1988 жылы туған әйел мен 8 жасқа таяған бала табылды. Анасы мен қызының ешқандай құжаты жоқ, хат танымайды. Әйел сөйлесуден бас тартқан, бірақ Әйелдерді қолдау орталығындағы қызметкерлердің көмегі арқылы полицейлер оны тұрмыстық зорлық-зомбылықтан жәбір көргендер үйіне жеткізген.
"Қызы мектепке бармаған, ойыншықтың не екенін білмейді. Қазір анасы мен баласына медициналық, психологиялық және құқықтық көмек көрсетіліп жатыр. Өзінің айтуынша, Оңтүстік Қазақстан облысының тумасы. Қазір оның кім екенін анықтау және құжат жасау жұмыстары жүргізіліп жатыр", - деді СҚО ПД Криминал полиция басқармасының бастығы, полиция полковнигі Петр Климов.
Олар Криминал полиция қызметкерлері Әйелдерді қолдау орталығымен бірлесе атқаратын профилактикалық жұмыстарының нәтижесінде табылған. Бір азамат Қазақстан дағдарыс орталықтары одағының адам сатуға қарсы қызметінің жедел желісіне (116-16 нөміріне) хабарласқан және олар әрі қарай СҚО полицейлеріне жеткізген.
