"Динара Сатжан кеш жүргізгені үшін 1,5 миллион теңге алды": Қарағанды облысында журналистерді марапаттау рәсімі дауға ұласты

“Бір жарым миллион теңгені Динара Сәтжан қарағандылық журналистерге "Алтын сұңқар" мүсінін сыйлағаны үшін алған. Оның үстіне визажист жалдаған. Менде дәлел бар. Бір қызығы, "Хабар" агенттігі" АҚ-ның басқарма төрағасы Берік Уәли Қарағандыға облыс журналистеріне тегін келді ме, әлде ол да қаражат алды ма? Кімнің ақшасымен төлемді жасады екен? Халықтікімен бе?”, – деп жазды Facebook-те желі қолданушысы Айнұр Балакешова. 

Сондай-ақ, Балакешова марапатты блогер емес, еңбегі сіңген журналистер бергені дұрысырақ болар еді деген ой тастады. Ол Сатжанның орнына шақыруға болатындардың қатарында Валерий Петухов, Вера Абишева сияқты тұлғаларды атады. 

“Мүсінді журналистиканың нағыз шеберлері ұсынса, дұрысырақ болар еді деп ойлаймын. Мысалы, 30-дан астам кітаптар мен фотоальбомдардың авторы Валерий Петухов көптеген кәсіби фотокөрмелердің, соның ішінде халықаралық көрмелердің қатысушысы. Жүргізушілікке тамаша үміткер – жүздеген журналистерді "тәрбиелеген" Бөкетов атындағы университеттің журналистика кафедрасының профессоры Абишева Вера Түкенқызы. Сондай-ақ кәсіби, журналистиканың акуласы – Екатерина Борисовна Кузнецова. 

Журналистер менімен келісетін шығар, Вера Түкеновна мен Валерий Евстафьевичтің қолынан марапат алу, құттықлау сөздерін есту әлдеқайда жағымды және символикалық болар еді”, – деп жазды ол.

Бұл кісілердің орнына Динара Сатжанды шақыру тренд деп бағалады ол.

“Қарағанды мемлекеттік университеті журналистика факултетінің көптеген түлектері – республикалық және аудандық деңгейдегі БАҚ-тың беделді журналистері. Мүмкін инста-бикеш Сатжан жарнамалық посттарды жариялауды ұнататын шығар, ал алты нөлі бар баға ұсынатын коммерциялық шараларларға оны шақыру тренд шығар”, – деді желі қолданушысы. 

Постқа қатысты блогер Динара Сатжанның өзі де пікір білдірді. Бұл жағдай үшін өзін кінәлі санамайтынын айтты. 

“Өз жұмысымды атқардым. Осы ретте саудаласқан жоқпын. Ұсынды, мен қабылдадым. Келдім, өткіздім, құттықтадым. Сондықтан әріптестер, ренжімеңіздер. Мейрем құтты болсын!”

Сондай-ақ, ол өзін сынаған әйелге қызғаныштың денсаулыққа зиян екенін айтты. Өзіне шынымен де ақы төленгенін, алайда желі қолданушысы айтқан бағадан екі есе аз төлемақы төленгенін мойындады.

“Екі есе аз төледі, себебі бюджеті сондай болған. Түсінемін, ішіңіз ашитын шығар. Астанадан Дина келді, шараны Айнұр өткізе беруге де болар еді ғой дегендей. Бұл жерді енді менің кәсібилігім, тәжірибелігім рөл ойнады ғой. Айнұр, менің тұлғалық даму бойынша курсыма қатысыңыз, өзімнің фишкам неде екенін айтамын.  Салтанатты шараға қатысқан әріптестеріңізден сұрап көріңіз. Иә, шара жүргізу де жұмыс. Соған сәйкес оған қаражат төленеді”, – деді Сатжан.

Қарағанды облысы әкімдігі өз кезегінде марапатты жыл сайынғы шара деп атады. 

“Марапаттау рәсімі 2006 жылдан бері жыл сайын ұйымдастырылып келеді. Бұл денсаулық сақтау, мәдениет, білім беру саласында өткізіліп жүрген премияларына ұқсас шара”, – деді басқармада.

Не себепті әкімдік басқа да беделді журналистер емес, дәл Сатжанды шақыруды ұйғарды деген сұрағымызға әкімдік былай деді:

“Динара Сатжан тек жүргізуші болды, марапат ұсынған жоқ. Оны біздің жерлесіміз әрі журналист ретінде шақырдық”, – деп жауап берді әкімдікте.