Джип мінген Алматы облысының тұрғыны 30-дан аса қой-ешкіні басып өткен
Алматы облысында мас халде көлік жүргізген адам тасжол бойында 30-дан аса қой-ешкі, қозы-лақты басып өткен. Қазір ол оқиғаның видеосы әлеуметтік желіде тарап жатыр, деп хабарлайды Paryz.kz, Halyq-uni.kz-ке сілтеме жасап.
Өлі малдарды телефонымен видеоға түсіріп жүрген адамның айтуынша, оқиға кеше Тоғызбұлақ-Қалжат тасжолы бойында болған. Видеоны желіге жүктеген Дамир Аспанның жазуынша, көлік иесі мас болған және тоқтамастан кетіп қалған.
Ал облыстық Полиция департаменті оқиға 20 мамыр күні Ұйғыр ауданында болды деп отыр.
«Toyota Lend Cruiser» автокөлігін Талғар ауданының 25 жастағы тұрғыны басқарған. Ол «Ақсай-Шонжы-Қалжат» тас жолының 55 шақырымында бір отар қойды қағып өткен. Медициналық сараптама барысында көлік жүргізушісінің масаң күйде болғаны анықталды. Жол-көлік оқиғасы дерегі бойынша ӘҚБтК-нің 608-бабы және 610-баптары бойынша әкімшілік іс қозғалды. Жол ережесін бұзған адам ұсталып, қамауға алынды», - деді Алматы облысының ПД баспасөз қызметі журналистерге берген жауабында.
