15 жасында екі баланың анасы атанған оқушы ұлының әкесін анықтады

Диана Құдайқұлова 2022 жылдың 8 ақпанында екінші ұлын дүниеге әкелді. Сәбидің салмағы – 3,5 келі, бойы – 52 сантиметр. Есімін Нұржан деп қойды. Күдікті әке деп танылған Алмат Қалжанов өткен жылдың мамыр айында Дианамен кездесіп, жыныстық қатынасқа түскенін мойындады. Алайда "менен де басқа жігіттері болғандықтан, баланың әкесі өзге азамат болуы мүмкін" деп күмән келтірді. Оның үстіне, айтуынша, Диана онымен танысқан кезде кәмелеттік жасқа толдым деп алдаған. Жұмыс істейтін қыз болғандықтан, Алмат та оның сөзіне сенген. Оқушы деп ойламаған.

"Бала туылды дегеннен бастап уайым болды. Менің балам болса, не істеймін дедім. Бір жағынан, қуанамын, екінші жағынан, жүрегім ауырады. Мен Дианамен толыққанды отбасы болғым келген, бірақ ол Шынболатты таңдап кетті", –  дейді Алмат Қалжанов.

Шынболат есімді азамат – Диананың қазіргі сүйіктісі. Ол Диананың екі баласын өз баласындай көріп, бағуға дайын екенін жеткізді. Болашақта Дианамен отау құрғысы келетінін айтты. Оның пікірінше, әуел баста баласын мойындамаған Алматтың ертеңгі күні оған қамқорлық танытуы екіталай. 

"Дианаға мені Құдай жіберді деп ойлаймын. Мен – қарапайым отбасыдан шыққан баламын. Менен болмаса да, өзімнің балам", –  дейді Шынболат Аяпбергенов. 

Сонымен наурыз айының басында Алмат пен Диана ДНҚ сараптамасын жасатты. Оның нәтижесі бойынша, сәби Алмат Қалжановтың баласы болып шықты. Өзі де әкесіз өскендіктен, Алмат ұлына әке тәрбиесін бергісі келетінін айтты. Алайда Алмат елдің алдында оған сенбестік танытып, жанжал шығарғаннан кейін, Диана Құдайқұлова баланы әкесіне көрсетпеймін де, бермеймін де деп отыр.