Енді эко жасататын қазақ әйелдер шежіреге қарап, баланың руын таңдай алады

Қазақстанда суррогат анаға "эмбрион" эко квотасы арқылы салынуы мүмкін. Ал келіншектерге аталық ұрықты "шежіре қарап" таңдап алу мүмкіндігі беріліп отыр. Яғни, балаңыздың қандай рудан болуы керек екенін тек өзіңіз шешесіз, деп хабарлады paryz.kz, "31 арнаға" сілтеме жасап.

Құны кемінде 1 миллион 200 мың теңге тұратын жасанды ұрықтандырудың бұл процедурасы келесі жылы 7 мың адамға квота арқылы жасалатынын ескерген мамандар, пациенттердің жас шамасы мен денсаулығына байланысты талаптарды кеңінен қарастырып жатқандарын айтады.

23 жылдан бері балаға зар болған әйелдің ендігі үміті – ұрықтандыру жолымен сәби сүю. Жолдасы болмағандықтан, эко орталықта дайын, тексерілген ұрықты құрсағына салдыруға бел байлапты. 43 жастағы әйелдің басты талабы – баланың арғы ата тегі Найман руынан болуы керек екен.

"Квотаға жасым келмейді, сондықтан оған жүгінбедім. Ақылы түрде экоға ұрық салдыруға келісім жасадым", - дейді ол.

Квота күтпей, тезірек бала сүйгісі келгендердің бірі – 36 жастағы Тойдық Ілиясова. Жолдасымен келісіп, эко салдырған. Ол жасанды ұрықтандыру көмегімен бірнеше рет бала көтере алмай жүрген жұптарға суррогат ананың көмегі керек-ақ деп ойлайды.

"Көп адамның жағдайы келе бермейді, қалтасы көтере бермейді. Мысалы, қаншама адамдар келгісі келеді. Қаражаты жетпейді. Ал квотаны күтсе әркімге әрқалай айтады, біреуге жарты жыл күту керек, екі ай, бір жыл, солай", - деді Тойдық Ілиясова.

Суррогат анаға ұрықты эко орталықтар арқылы квотамен салдыру және донорлық ұрықты алатындарға қатысты мәселе "Аңсаған сәби" бағдарламасы іске қосылады дегеннен бері қызу талқыланып жатқан көрінеді.

"Министрлікке жазып та, айтып та жатыр, донорлық ұрық алатындар да осы квотаға кірсінші деп. Суррогат ана әлі кіріп тұрған жоқ, бірақ, кірген жағдайдың өзінде бағдарламасы ғана квотаға кіреді", - дейді Репродуктивтік медицина институтының репродуктолог-дәрігері Ләззат Айтқожина.

Жатыр түтікшесі жоқ немесе одан ұрық өтпейтін әйелдер мен белсіздікпен ауыратын ер адамдарға квота қарастырылып келсе, енді денсаулығында өзге де кінәраты бар жұптар кіреді екен. Сондай-ақ, дәрігерлердің айтуынша, пациенттердің де жас шамасы ұзартылады.

Жалпы, эко орталыққа келетін 100 адамның кемінде 30-ы ұрықты сатып алуға мәжбүр болады екен. Бастысы, шежіресіне қарап ұрықты таңдап алу мүмкіндігі беріледі.

Дәрігерлердің айтуынша, келесі жылы берілетін 7 мың квотаның 40 пайызы оң нәтиже берсе, елдің демографиясына әжептәуір әсер етеді.