Арқалықтағы құс фабрикасы министрліктің мәлімдемесін жоққа шығарды

"Агроинтерптица" ЖШС Ауыл шаруашылығы министрлігінің кәсіпорындағы құстардың асфиксиядан өлгені туралы мәлімдемесімен келіспейтінін жеткізді, деп хабарлады azattyq-ruhy.kz.

13 қазанда Орталық коммуникациялар қызметінде өткен брифингте ҚР АШМ Ветеринариялық бақылау және қадағалау комитеті төрағасының міндетін атқарушы Тұрсын Қабдолданов "Агроинтерптица" ЖШС-інде 391 мыңнан астам бас құс қырылды. Оның ішінде желдетудің болмауы салдарынан асфиксиядан 256 040 құс қырылды, олар өтелуге жатпайды. Құс тұмауын жұқтыру салдарынан 135 384 бас құс қырылды. Тағы 41 642 бас тәркіленіп, жойылды", - деп мәлімдеген еді.

Алайда, кәсіпорын басшылығы зертханалық талдау нәтижесінде, құс фабрикасында болған өлімге құс тұмауы себеп болғаны расталғанын айтып, министрліктің ақпаратын жоққа шығарды.

"Агроинтерптица" ЖШС бұл ақпараттың шындыққа жанаспайтынын ресми түрде мәлімдейді. Жоғары патогенді құс тұмауы басталғанға дейін кәсіпорында 502 600 бас құс болған. 18 қыркүйекте құс өлімінің қалыптан тыс жағдайы тіркелді. 21 қыркүйекте кәсіпорынды тексеру және малдың сынамаларын алу үшін кәсіпорынға Ауыл шаруашылығы министрлігі Ветеринариялық бақылау және қадағалау комитетінің өкілдері, сондай-ақ, жергілікті атқарушы билік органдарының өкілдері келді. Үлгілер Республикалық ветеринариялық зертханаға жіберілді және 22 қыркүйекте үлгілерде жоғары патогенді H5 типті құс тұмауының болуын растау туралы қорытындысы алынды. Бұл зертханалық зерттеулер ауылдағы эпизодтық қолайсыз жағдайды растады. Қостанай облысының әкімдігі карантин енгізу туралы қаулы шығарды", - деп хабарлады.

Сонымен қатар, кәсіпорын өз тарапынан өлген құс тіндерінің сынамалары мен үлгілерін Новосибирск сынақ зертханасына жіберді (RA.RU.21ПП82 аккредиттелген зертханалардың тізіміндегі нөмір). Бұл зертхана құстардың H5 типті жоғары патогенді құс тұмауымен зақымдануын растады.

"Ресейде құс тұмауының өршуі туралы алғашқы хабарламалар пайда болғаннан кейін біз бірден фабрикадағы дезинфекцияны күшейту бойынша қосымша шаралар қабылдадық. Сондай-ақ, біз 2 қыркүйекте құс басын вакцинациялау үшін вакцина бөлуге өтініш бердік, бірақ, бүгінгі күнге дейін бұл өтінімге жауап ала алмадық. Өз қаражатымыз есебінен 12 тамызда құс тұмауына қарсы құс басының бір бөлігін VOLVAC B.E.S.T.AL+ND вакцинасымен вакцинацияладық. Бірақ, Новосибирск зертханасындағы зерттеу вакцинацияланған құстардың да құс тұмауынан өлгенін көрсетті", - деді құс фабрикасының директоры Жамиля Исмайлова.

Бүгінгі таңда құс фабрикасы бос тұр. Кәсіпорын аумағында жойылуы тиіс 69 545 бас өлген құс қалған. Қоймаларда жойылуы тиіс 2 064 мың жұмыртқа бар. Алайда, Ауыл шаруашылығы министрлігі Ветеринариялық бақылау және қадағалау комитетінің Республикалық эпизоотияға қарсы жасағы жою процесін кешіктіріп жатыр екен. Сондай-ақ, өтемақы төлеу үшін қажетті құжаттарды беру кезінде уәкілетті органдар тарапынан кідіріс бар екен.

Сонымен қатар, кәсіпорын жылына екі рет эпизоотиялық қауіпсіздік талаптарына сәйкестігіне арнайы тексеруден өтуге міндетті екен. Соңғы тексеру 2020 жылдың шілдесінде жүргізіліп, кәсіпорынның қауіпсіздігі расталған.