Енді жедел жәрдем дәрігерлері видеожетон тағады

Денсаулық сақтау министрлігі ақхалаттылардың қауіпсіздігі үшін медицина қызметкерлерін видеожетон тағып жүруге міндеттемек.

«Біз осы нормаға былтыр бастамашы болған едік. Ал енді биыл тиісті бұйрықтарға енгіздік. Пилоттық режимде Алматы мен Астанада облыстық жедел жәрдем станцияларындағы медициналық қызметкерлердің видеожетон тағуы мәселесін пысықтадық. Бұл медициналық қызметкерлерді де, кейбір бұзақыларды тәртіпке үйретеді», - дейді Әлназарова Үкіметте өткен брифингте. 

Министрдің айтуынша, бірінші кезеңде видеожетонмен жедел жәрдем қызметкерлері қамтылса, екінші кезеңде емханалардағы дәрігерлер мен медбикелерге де видеожетон беру мәселесі қарастырылып жатыр.

«Менің ойымша, мұны іске асыру үшін бізге үш ай уақыт керек. Ал жетондарды сатып алу жұмысы медициналық ұйымдар мен әкімдіктер тарапынан жүзеге асады», - деді ол.