Некені бұзудың шығындары көбейеді

Қазіргі кезде некені бұзу бойынша соттарға шағым түсіргенде 0,5 АЕК (1 966 теңге) көлемінде мемлекеттік бажды төлеу керек.

"Некені бұзу туралы соттарға талап қоюлардан мемлекеттік баж мөлшерлемесін 5 АЕК-ке (2025 жылда - 19 660 теңгеге) дейін көбейту ұсынылып отыр", - делінген мәжілістің ресми хабарламасында. 

Бұдан бөлек, I, II және III топтағы мүгедектігі бар адамдар мен мүгедектігі бар балалар үшін әлеуметтік салық шегерімін 5 мың АЕК мөлшеріне дейін арттыру жоспарланған. 

Салық кодексі аясында алкоголь мен темекі өнімдеріне, сондай-ақ құрамында қыздырылған темекі бар өнімдерге акциз мөлшерлемелерін кезең-кезеңімен арттыру жоспарланып отыр. Ал энергетикалық сусындар мен құрамында транс майлары бар өнімдерге акциз мөлшерлемесі енгізіледі.

Айта кетері, бүгін мәжіліс депутаттары үкімет ұсынған салық кодексінің жобасын бірінші оқылымда қабылдады. Екінші оқылымға дейін оған басқа да ұсыныстар енгізілуі мүмкін.