Астана
-5.03°C
Астана
-5.03°C
Елімізде өндірілетін титанды «Boeing», «Airbus», «Nippon Steel», «SNECMA», «General Electric» компаниялары қолданады. Бұл туралы Өнеркәсіп және құрылыс министрлігінен мәлім етті, деп хабарлайды Paryz.kz.
«Бүгінгі таңда Қазақстанда сирек металдар „Үлбі металлургия зауыты“ АҚ (бериллий, тантал, ниобий), „Өскемен титан-магний комбинаты“ АҚ (титан), „Жезқазғансирекмет“ РМК-інде (аммоний перренаты), сонымен қатар негізгі металдардың ірі өндірістері негізінде ілеспе өнім ретінде „Казцинк“ ЖШС (селен, висмут), „Қазақмыс Смэлтинг“ ЖШС (мыс теллуриді), „Қазақмыс Прогресс“ ЖШС-інде (байытылған селен) өндіріледі. Атап айтқанда, „Үлбі металлургия зауыты“ АҚ квазимемлекеттік „Самұрық-Қазына“ ҰӘҚ» АҚ еншілес компаниясы және әлемдегі толық циклді 3 бериллий өндіруші, 4 тантал мен ниобий өндіруші кәсіпорындардың бірі саналады. «Өскемен титан-магний комбинаты» АҚ титан губкасын, құймалар мен слябтарды шығарады, титан қорытпалары мен ванадий пентаоксидін шығаруға арналған қуаты бар. Титан өнімдері шетелдік тұтынушыларға («Boeing», «Airbus», «Nippon Steel», «SNECMA», «General Electric») жеткізіледі», — делінген министрліктің агенттік сауалына берген жауабында.
Ведомствоның атап өтуінше, «Жезқазғансирекмет» РМК «Қазақмыс корпорациясы» ЖШС мыс балқыту зауытының қалдықтарынан 69,2 пайыз рений бар аммоний перренатын шығарады.
Ол шетелдік тұтынушыларға жөнелтіледі.
Қазіргі уақытта кәсіпорын ренийдің әлемдік өндірушілерінің ондығына кіреді.
«Қазмырыш» ЖШС компанияның негізгі өнімдерінің қатарына жатпайтын өрескел селен мен висмут өндіреді және экспорттайды.
Селен мен висмут қорғасын зауытында құрамында қорғасын бар шикізатты өңдеу нәтижесінде алынады.
«Қазақмыс Смэлтинг» ЖШС экспортқа Балқаш мыс балқыту зауытының шламдарынан теллур өндіреді.
Осы компания Балқаш мыс балқыту зауытының бағалы металдар өндірісінің үйінді қождарынан өрескел селен шығару бойынша қазақстандық инновациялық технологияны енгізді.
«Қазақстан алюминийі» АҚ глинозем зауытының алюминий ерітіндісінен галлий алуға арналған қуаты бар.
«Галлий — компанияның негізгі өнімі емес. Галлий шығару учаскесі 2015 жылы төмен рентабельділікке байланысты сақталды. Әр сирек метал өндіруші кәсіпорын шикізат көздерімен, технологиялық алу жолдарымен, қызмет бағыттарымен ерекшеленеді. Сондықтан саланы монополияландыру мәселесін қозғау орынсыз деп пайымдаймыз», — деп атап өтеді министрліктен.
