Астанада күдіктілерді кінәсін мойындату үшін соққыға жыққан төрт полицей сотталды

Сот полицейлердің күдіктілерді кінәсін мойындау үшін азаптау әрекеттерін жасағанын анықтады.

- Т., Ә., Ж. және М. полиция қызметкерлері бола тұра мүліктік қылмыстардың алдын алу, анықтау, жолын кесу және ашу бойынша жедел-іздестіру, жедел-профилактикалық іс-шараларын жүргізумен айналыса отырып, алдын ала сөз байласып, қалта ұрлығын жасады деген күдікпен қамауға алынған төрт адамға кінәсін мойындату мақсатында физикалық күш қолдана отырып, психикалық зиян келтірген, - делінген сот хабарламасында.

Сотталушылардың кінәсі жәбірленушілердің айғақтары, сот-медициналық сараптамасының қорытындысы, сот-психологиялық сараптамаларымен және қылмыстық істің басқа да материалдарымен дәлелденді.

- Сот үкімімен Т.,Ә. және М. ҚК 146-бабы, 2-бөлігінің 1, 2) тармақтарында көзделген «Қатыгез, адамгершілікке жатпайтын немесе қадір-қасиетті қорлайтын қарым-қатынас, азаптаулар» бойынша кінәлі деп танылып, әрқайсысына 4 жылға бас бостандығынан айыру және 3 жылға мемлекеттік қызметте және құқық қорғау органдарында қызмет атқару құқығынан шеттету жазасы тағайындалды.

Ж. ҚР ҚК 146-бабы, 2-бөлігінің 1-тармағында көзделген «Қатыгез, адамгершілікке жатпайтын немесе қадір-қасиетті қорлайтын қарым-қатынас, азаптаулар» бойынша қылмыстық теріс қылық жасағаны үшін кінәлі деп танылып, 3 жыл 6 айға бас бостандығынан айыру және және 3 жылға мемлекеттік қызметте және құқық қорғау органдарында қызмет атқару құқығынан шеттету жазасы тағайындалды.

Қылмыстық кодекстің 49-бабының 1-бөлігінде көзделген «Арнаулы, әскери немесе құрметтi атақтан, сыныптық шеннен, дипломатиялық дәрежеден, бiлiктiлiк сыныбынан және мемлекеттiк наградалардан айыру» бойынша М. және З. «Полиция аға сержанты», Ә және Т «Полиция сержанты» арнайы шендерінен айырылды, - делінген сот үкімінде.