Туған әкесінің қолынан қаза тапқан 4 жасар бала өлімі: Ақтөбеде сот отырысы басталды

«Диапазон» басылымының жазуынша, сот отырысында мемлекеттік айыптаушы қылмыстық істің жантүршігерлік жай-жапсарын мәлім етті.

Жақында сотқа жіберілген қылмыстық іс бойынша алдын ала сот отырысы бүгін өтті. Баланы өлтірді деп айыпталушы – оның туған әкесі. Тергеушілердің мәліметінше, 40 жастағы ер адам үшемді күштеп тәрбиелеу мақсатында жиі ұрып-соғып келген. Ол балалардың анасы ата-ана құқығынан айырылған соң өз қарауына алған. Оның балаларын ұрып-соғатыны «Үміт» балалар үйіне әкелген кезде анықталған. Балалар үйінің қызметкерлері балалардың дене жарақатын көрген соң полиция шақыртып, оның үстінен әкімшілік іс қозғалған.

«Ал кейінірек жалдамалы пәтерде әкесі 4 жасар Данилге тап беріп, аяусыз соққыға жыққан. Бала қыңқылдап, ауырып әрі сол күні әжесінің үйінде болған бауырларымен ойнағысы келген. Баласының жылағанына шыдамаған әке оның басынан және бетінен доғал затпен ұрып, ішінен бір рет қатты соққы берген. Соққы салдарынан бала сол пәтерде қайтыс болған. Баланың әкесі артынша 20 000 теңгеге жүк тиеуші-экскаватор жалдап, шұңқыр қазып беруін өтінген және жүргізушіге ата-анасының үй салып жатқанын, сондықтан керексіз қоқысты сол шұңқырға көму керек екенін айтқан. Кейіннен сол шұңқырға баласының денесін к көміп тастаған. Ал бірнеше күннен кейін полицияға ұлының жоғалып кеткенін хабарлаған», - деп жазады басылым.

Фото: diapazon.kz

Алдын ала тергеуде адвокат соттан күдіктінің тергеу барысында берген айғақтарынан бас тартып, тергеу органдарының қысым көрсеткенін мәлімдеуіне байланысты қосымша тергеу шараларын жүргізу үшін істі прокурорға қайтаруды сұрады. Адвокат сонымен қатар жаңа айыптың адам өлтіру ниетін зерттемегенін, күдіктінің қосымша сараптама жүргізу туралы өтініштері қанағаттандырылмағанын айтты.

Тақырыпқа орай: «Оған да сыйлық дайындап едік»: Ақтөбеде 4 жасар Данилмен қоштасу шарасы өтті

Судья қорғаушының өтінішін қанағаттандырмай, негізгі сот отырысының күнін белгіледі.

Еске салайық, өткен жылдың желтоқсан айында еріктілер мен полицейлер із-түзсіз жоғалып кеткен 4 жасар Данил Ахуновты іздестірген болатын. Баланың туыстарының айтуынша, ол әжесінің үйінің ауласынан жоғалып кеткен. Баланың фотосуреті бар хабарландырулар қаланың әр түкпіріне ілінді. Екі күннен кейін бүлдіршіннің шұңқырға көмілген денесі табылды. Кейін полиция кісі өлтірген күдіктінің ұсталғанын мәлім еткенімен, оның нақты кім екенін ресми түрде атамаған болатын.