Астана
8°C
Астана
8°C
Апатқа ұшыраған Toyota Land Cruiser жол талғамайтын көлігінде болған екінші оқушы қыз Ақтөбе ауруханасында қаза болды, - деп хабарлайды Paryz.kz ақпарат агенттігі "Мой город" басылымына сілтеме жасап.
Еске салайық, қайғылы оқиға Шалқарда 4 наурызда кешке болған. Тоғызыншы сынып оқушысы Toyota Land Cruiser көлігінің тізгініне отырып, рөлді басқара алмай, жол талғамайтын көлік аударылып қалған. Көлік салонында жүргізушіден басқа тағы екі ұл мен екі қыз болған. Олардың бәрі Шалқар қаласындағы мектептің тоғызыншы сынып оқушылары.
Оқиға салдарынан бір оқушы қыз сол жерде қаза болған, екіншісі ауыр халде ауруханаға жеткізілді. 16 жастағы оқушы қызда ашық бас-ми жарақаты, ми ішілік қан құйылу, мидың ісінуі, бас сүйегінің сынуы болжанған. Зардап шегуші комаға түсіп, 5 наурызда сағат 18:30-да қаза болған.
15 жастағы 1 бала тексерілгеннен кейін амбулаторлық ем алуға үйіне жіберілген, оның денесі көгерген, аяқ-қолы жараланған. 15 жастағы екі ұл облыстық балалар ауруханасына жіберілген. Бірінде жамбас сүйегінің төменгі ұшы сынса, екіншісінің аяғы бірнеше жерден сынған.
Ақтөбе облысының Полиция департаменті 9-сынып оқушысы ағасынан сұрамай Toyota Land Cruiser көлігін алып кеткенін хабарлады. ҚР Қылмыстық кодексінің 345-бабы 3-бөлігі "Абайсызда адам өліміне әкеп соққан жол қозғалысы ережелерін бұзу" бойынша соталды тергеу басталды.
