ШҚО-да екі қалаға ауыл мәртебесі берілуі мүмкін
Бүгінгі таңда Серебрянск қаласында 8 245 адам, ал Шар қаласында 6 541 адам тұрады.
Шығыс Қазақстан облысында 6 аудандық маңызы бар қала бар. Олардың екеуі өз мәртебесіне лайық емес, деп хабарлады paryz.kz, YK-news.kz-ке сілтеме жасап.
Заңнамаға сәйкес, аудандық маңызы бар қалаларға тұрғындар саны 10 мың адамнан кем емес елді мекендер жатады.
ШҚО экономика және бюджеттік жоспарлау басқармасының ақпараты бойынша, өңірдегі екі қала бұл өлшемге сәйкес келмейді. Бүгінгі таңда Серебрянск қаласында 8 245 адам, ал Шар қаласында 6 541 адам тұрады.
"Жақын арада бұл қалалар ауылдарға айналуы мүмкін", - деп жазылған басылымда.
"Қазақстан Республикасының әкімшілік-аумақтық құрылысы туралы" заңға түзетулер енгізіліп жатыр. Заң жобасында жергілікті өкілдік және атқарушы органдарға мәртебеге сәйкес келмейтін қала тұрғындарының пікірін ескере отырып, ҚР Үкіметіне қаланы ауылға өзгерту жөнінде ұсыныстар енгізуге құқық беріледі", - деп нақтылады ведомстводағылар.
Серебрянск қаласы ШҚО Алтай ауданында орналасқан. Ертіс өзені мен Өскемен су қоймасының оң жағалауында, Үлбі жотасының оңтүстік беткейінде орналасқан. Қала мәртебесін 1962 жылы алған. 2009 жылғы санақ бойынша, қалада 10 129 адам тұрып жатқан.
Шар қаласы ШҚО Жарма ауданында орналасқан. Шар өзенінде орналасқан (Ертіс тармағы). 2009 жылғы санақ бойынша қалада 8 156 адам тұрып жатқан.
