Астана
-0.03°C
Астана
-0.03°C
Грузия парламенті сейсенбі күні бірінші оқылымда мақұлдаған «шетел агенттері» туралы заңға байланысты басталған Тбилиси орталығындағы наразылық акциясы ушығып, екінші күнге жалғасты, деп хабарлайды Paryz.kz ақпарат агенттігі ҚазАқпарат сайтына сілтеме жасап.
Бірнеше сағат бойы мыңдаған адам қатысқан ереуіл салыстырмалы түрде тыныш өтті. Жергілікті уақыт бойынша түн ортасына бір сағат қалғанда, наразылық білдірушілердің бір бөлігі парламент ғимаратын қоршай бастағанда жағдай ушықты.
Әлеуметтік желілерде наразылық білдірушілердің парламент ғимаратының терезелерін сындырмақ болғаны, полиция мен арнайы жасақтың су атқыштар, дыбыс шығаратын гранаталар мен көзден жас ағызатын газ қолданып жатқанын көрсететін бейнематериалдар пайда болды. Грузия билігі наразылық күш көрсету сипатына ие болды деп мәлімдеді.
Осыдан кейін арнайы жасақ наразылық білдірушілерді парламент жанындағы алаң мен маңындағы көшелерден ығыстырып шығаруға кірісті.
Түн ортасынан кейін арнайы күштер Руставели даңғылындағы акцияны таратып, Парламентке қарама-қарсы аумақты толығымен басып алды.
Грузин ақпарат құралдарының хабарлауынша, наразылық білдірушілер арасында арнайы жасақтан қашқан кезде пайда болған газ, түтін және төбелестен зардап шеккендер көп. Қамауға алынғандар да бар.
