Мәжілістің сайлауалды дебатына 47,9 млн теңге жұмсалатын болды

Орталық сайлау комиссиясы бүгін сайлауалды дебатқа бюджеттен 47,9 млн теңге жұмсалатынын хабарлады. Бұл - тек Мәжіліске ұсынылған кандидаттар арасында өтетін пікірсайысқа бөлінетін қаржы. Ал мәслихат кандидаттарының дебатына қанша бөлінетіні белгісіз, деп хабарлады Азаттық радиосы.

ОСК мәліметінше, пікірсайыс мемлекеттік "Хабар" арнасынан тікелей эфирде көрсетіледі. Үш раундтан тұратын дебат тақырыптары: "Қазақстанның экономикалық дамуы" және "Азаматтардың әл-ауқаты". Дебатқа сайлауға түсетін 5 партия жетекшілері (тек "Адал" партиясынан саяси кеңес мүшесі) қатысады.

10 қаңтарға белгіленген Мәжіліс және мәслихат сайлауына 5 партия қатысады: Nur Otan, "Ақжол", "Адал", "Ауыл" және "Қазақстан халық партиясы". Олардың арасында оппозициялық партия жоқ. Саяси оппозиция өкілдері Парламентте бірде-бір шынайы оппозициялық саяси күш жоқ деп санайды және шынайы оппозициялық партиялардың ресми тіркеуден өте алмай отырғанын айтады.

ОСК мәліметінше, 5 партия Мәжіліс сайлауына 312 кандидат (90 әйел, 222 ер адам), мәслихатқа 832 кандидат ұсынған.

Қазақстан заңнамасы бойынша, депутат болғысы келетін адам партия арқылы ғана сайлауға түсе алады. Жеке кандидат ретінде тіркелуге мүмкіндік жоқ.

Сарапшылар қаңтар айына жоспарланған сайлауға билікке жақын партиялар ғана жіберілді деп санайды. ЕҚЫҰ бастаған халықаралық ұйымдар Қазақстанда өткен сайлаулардың барлығын "демократиялық талаптарға сай" деп мойындамаған.