«Қазақ тілі мәмбеттік тіл деген пікірмен 20 жылдан аса күресіп келемін» — Ерболат Беделхан

«Менің Оңтүстік Кореядағы партнерім бар, оның туған ағасы Кореяда легендарлық композитор болып саналатын - Томми Ли. Бірақ, ол маркетинг саласында әр түрлі әйгілі орталықтармен жұмыс істеп, мемлекеттік шаруалармен айналысады. Мен оған өзім жазып, ұсыныс білдіргесін, ол кері хабар берді», - дейді Ерболат Беделхан.

Осы ретте, жүргізуші продюсерге “Сіз Корея мемлекетінің мәдени экспансиясын жүзеге асыруға көпір болып отырған жоқсыз ба?” деген сауал қойды.

«Сіз жаман қарағыңыз келсе, бүкіл дүниеден жамандық тауып аламыз. Екіншіден, бұл жерде үлкен адаптация жүргізу мәселесі. Мақсат: сол кісілердің жүйесін ала тұра, өзіміздің Қазақстанда, Орталық Азияда сондай қайтадан жанр, субмәдениет қалыптасса екен деген дүние. Негізінде, тікелей мені Кореямен ешнәрсе қоспайды. Ешқандай келісім жоқ. Қорқудың қажеті жоқ. Мені сондай деңгейде емеспін», - дейді продюсер.

Ерболат Беделханның айтуынша, музыка тілге бөлінбейді.

«Мен 91 жылы Қазақстанға келдім, сол кезде Қазақстанда барлығы орысша болды. Бұл - факт. Музыка болсын, барлығына экспансиясы өтіп кетті. Бүкіл музыка, Корея, Америка болсын емін-еркін өз тілінде Қазақстанға кіре береді. Кім қалай оған тосқауыл қояды? Мен, керісінше, Корея музыкасын тыңдаушы халықты қазақшаға үйреттім. Қазақ тілі мәмбеттік тіл деген пікірмен жиырма жылдан астам күресіп жүрмін», - деді продюсер.

Оған қоса, студия қонағы руханият пен креативке тоқталды.

«Адам креативпен айналысады. Креатив деген өнер, әр адамға креатив маңызды. Материалды дүние емес, рухани дүние маңыздырақ. Руханият деген басқаша. Музыканы көре алмайсың, ұстай алмайсың, бірақ музыкамен адам жылатасың, күлдіресің», - деді Беделхан.