"Мен үшін құны көк тиын": Сенатор неге ашуланды?

Депутаттар арасында әлеуметтік желіні белсенді қолданатын сенатор Мұрат Бақтиярұлы желіде қазақ тілінде салмақты материалдар тым аз деп есептейді, деп хабарлады paryz.kz.

"Саясатта жүрген соң жалпы әлеуметтің көңіл-күйін, болып жатқан қоғамдық құбылыстарға көзқарастарын білу үшін әлеуметтік желілерге кіресің. Алуан түрлі пікір, аспандата мақтаулар мен жер-жебіріне жеткізетін даттаулар, кішкентай алғыс хаттан бастап мемлекеттік наградалар алған суреттерімен өздерін-өздері жарнамалап тұрған адамдар, кішкентай қызметтен үлкен лауазымға тағайындалған адамдарды танысын-танымасын жапатармағай құттықтаулар, әйтеуір мен үшін құны көк тиын, жиіркенішті пенделік дүниелер көп", - деді депутат Facebook-тегі парақшасында.

Осы ретте сенатор қазақ тілінде салмақты посттар мен мақалалардың аздығына күйінді. 

"Салмақты, адамға ой салатын салыстырмалы сараптау материалдар қазақ тіліндегі желілерде тым аз. Керісінше, орыс тілінде жан-жақты сарапталған пікірлер көп жазылады. Неге бұлай? Бәлкім, ерте ме, кеш пе, бұдан да өтерміз", - дейді Мұрат Бақтиярұлы.