Жалдамалы пәтерден мәйіті табылған 20 жастағы бойжеткенге қатысты тың дерек шықты

Еуразия бірінші арнасының хабарлауынша, пәтер иесі марқұмның денесін тек екі тәуліктен кейін ғана көрген.

Себебі, баспананы жалға алған жігіт есікті сыртынан құлыптап, өзі қашып кеткен, деп жазды paryz.kz.

Бойжеткеннің мәйіті Шымкеттегі 18-ықшамаудандағы «Атамекен» тұрғын үй кешенінен табылған. Оқиға орнына барған полицейлер марқұмның Түркістан облысының тұрғыны екенін анықтады.

"Мәйітті қарау барысында мойын тұсында қылқындыру белгілері анықталып, сот-дәрігерлік сараптама қорытындысымен қылқындырудың салдарынан қайтыс болғаны белгілі болды. Қазіргі таңда күдіктіге бұлтартпау шарасы қолданылды", – деді Шымкент қаласы Полиция департаментінің басшысы Ералы Жұмаханбетов.

Шұғыл іздеуге кіріскен тәртіп сақшылары күдіктіні ұстады. Ол да Түркістан облысының 23 жастағы тұрғыны. Ер адам оқиға болған күні сол маңдағы бейнекамераға түсіп қалған. Ал марқұмның денесін алғаш пәтер иесі байқап, полиция шақырған.

"Екі өлім тіркеліп отыр. Бізде бір жігіт 10-қабаттан құлап, бір жігіт қайтыс болды. Ол да пәтерді жалға алған. Жас жігіт 29-да. Мына бойжеткен 20 жаста, өзі жүкті екен", – дейді тұрғын үй кешенінің төрайымы.

Оқиғаға байланысты қылмыстық іс қозғалып, тергеу басталды.