Түркістан облысында қолхатпен босатылған әйел тағы жеті адамды алдап соққан

Түркістан облысында 50-ден астам алаяқтық фактісіне қатысы бар әйел қамауға алынды, деп хабарлайды Paryz.kz, Polisia.kz-ке сілтеме жасап. 

Белгілі болғандай, Түркістан қалалық ПБ-ға жергілікті тұрғын арызданып, бейтаныс әйел ұлын мүгедектікке шығарып беремін деп сеніміне кіріп, 100 мың теңге ақшасын алып, жоқ болғанын айтқан. Алайда уәде етілген іс орындалмағаннан кейін өзінің оңбай алданғанын түсінген тұрғын полицейлерден көмек сұраған. Аталған факт Түркістанның полиция қызметкерлері ҚР ҚК-нің 190-бабы (Алаяқтық) бойынша СДТБТ-ға тіркеді.

Қылмысты жедел ашу мақсатында Түркістан ҚПБ-да тәжірибелі полиция қызметкерлерінен жедел-тергеу тобы құрылды, олар бірден алаяқтың жеке-басын анықтауға кірісті. Іздестіру іс-шаралары барысында күдікті жыл басынан бері бірнеше рет алаяқтық жасап, қолхатта жүрген Сарыағаш ауданының тұрғыны болып шықты. Оны полиция қызметкерлері Шымкент қаласындағы жалдамалы пәтерлердің бірінен жасырынып жүрген жерінен құрықтады, - деп хабарлайды Түркістан қалалық ПД баспасөз қызметі.

Түркістан полицейлерінің айтуынша, бұған дейін де, яғни жыл басынан бері сезіктінің алаяқтықтың 51 фактісіне қатысы бары анықталып, іс-құжаттар сотқа жолданған. Қазіргі таңда осы қылмыстық істер қаралып, 2021 жылы 15 маусымда соттың шешімімен 33 жастағы күдіктіге алты жылға бас бостандығынан айыру жазасы тағайындалды.

Белгілі болғандай, күдікті әйел жалғызбасты және жұмыссыз, өзінің кәмелетке толмаған екі қызымен бірге тұрады. Сонымен қатар соңғы бір айдың ішінде бас шарасы “қолхатта” жүрсе де, ескі әдетін тастамай, жеті адамды алдап, ақшаларын алып алғаны айқындалды. Ол оңай жолмен ақша табу мақсатында тұрғындарға өзін мемлекеттік қызметкер ретінде таныстырып, сенімдеріне ие болып, “қысқа мерзім ішінде мүгедектікке шығарып беремін” деген жалған уәдемен қарапайым азаматтарды сендірген. Қазіргі таңда соңғы алаяқтық жайттарына қатысты сотқа дейінгі тергеу амалдары жүргізіліп, құжаттар сотқа жолдану үстінде. Күдікті әйел қамауда.

Түркістан облысының полицейлері азаматтарға әр түрлі алаяқтардың айла-амалдарына түспеу үшін қырағы болуға шақырады.

Таныс емес адамдарға көп мөлшердегі ақшаны сеніп тапсырмаңыз. Сақ болыңыз және күмәнді қызметтерді ұсынатын адамдардан оңай пайда табуға үміттенбеңіз. Егер сіз, алаяқтықтың құрбаны немесе куәгері болсаңыз, тез арада полицияға “102” телефоны арқылы хабарласыңыз, делінген хабарламада.