«Берік Уәли Абай облысында 3-4 жыл әкім болып отырса, біраз өзгерістер болады» - Ринат Зайытов

Оның айтуынша, әкімнің мамандығына емес, іскерлігіне, ұйымдастырушылық қасиетіне қарау керек.

«Берік Уәли журналист қой деп, астын сызып айтасыздар, сонда кім, қай мамандықтың иесі әкім болуы керек? Өз басым Бекеңнің Абай облысына барғанына қатты қуандым. Себебі, ол облыспен қарым-қатынас үзбеген азамат. Семейге жаны ашиды. Мен Берік Уәлиді 2004 жылдан бері танимын. Өте ақылды, өте парасатты, мінезді жігіт.

Оның Абай облысына жоспары көп екенін жақсы білем. Оны іске асыру үшін де республиканың көп көмегі керек. Аурухана, театр сияқты шаруалар шешіле берер, олар туралы айтпай-ақ қояйық, ең өкініштісі, қазір Абай облысына бір зауыт сала алмайсың.

Себебі, электр энергиясы жетіспейді, жылу жетпейді, қазандықтар, желілер тозған, ескірген. Ол осы кедергілерді шешкісі келеді. Мұның бәрі көзге көрінбейтін істер болуы мүмкін, бірақ ең үлкен шаруалар. Енді депутаттар бар, министрлер бар, жұмыс істегісі келетін осындай әкімдерге көмектесуіміз керек.

Құдай қаласа, асыра айтты демесін, егер Берік Уәли Абай облысына 3-4 жыл әкім болса, онда біраз өзгерістер болады, жақсы өзгерістер болады деп ойлаймын», - деді депутат.