Қарағандылық зейнеткер көршісіне берген миллиондарын полиция арқылы тапты

Қарағанды қаласының тұрғыны 17 млн 500 теңге көлеміндегі ақшасын көршісіне сақтап қою үшін беріп, ақшаның жоғалғаны туралы полицияға шағымданған, деп хабарлады paryz.kz, Polisia.kz-ке сілтеме жасап.

Қалалық Полиция басқармасына қарасты Орталық полиция бөліміне 64 жастағы қала тұрғыны хабарласқан. Жәбірленуші полиция қызметкерлеріне бірнеше күн ауруханада жатқанын айтқан. Белгіленген емдеу шараларын алып, үйіне келген зейнеткер өзінің үйінде белгісіз ұрылардың болғанын хабарлаған.

Жәбірленушінің айтуынша, белгісіз біреулер кілт таңдау арқылы оның үйіне кіріп, 5 миллион теңге және 30 мың АҚШ долларын алып кеткен. Жәбірленушіге келтірілген шығын көлемі 17 миллион 500 мың теңге болған.

Аталған факті бойынша ҚР Қылмыстық кодексінің 188-бабымен ("Ұрлық") қылмыстық іс қозғалды. Полиция қызметкерлері мән-жайды анықтау барысында жәбірленуші өзінің жиған ақшасын ауруханаға жатар алдында уақытша сақтай тұру үшін көршісіне қалдырғанын есіне түсірді.

Айта кету керек, көршісі зейнеткердің барлық ақшасын өзіне қайтарып берді.