Зейнетақы шоты жоқ азаматтар да жұрттан қалмай өтініш беріп жіберген

Төрт күнде 49 миллиард теңге! Бірыңғай жинақтаушы зейнетақы қоры есепшоттан осынша соманы шешіп алуға рұқсат етті. Яғни 8 мыңнан астам қазақстандықтың өтініші мақұлданған, деп хабарлады paryz.kz, КТК телеарнасына сілтеме жасап.

Барлығы 10 292 адам өтініш түсірген екен. Жалпы сомасы 114 миллиард теңге. Алайда тек 8 мың адамның ғана өтініші орынды болып шыққан. Қалған 2 мың адам қорындағы қаржысы жетпей тұрса да ақша сұратыпты. Тіпті зейнетақы шоты жоқ азаматтар да жұрттан қалыспай, өтініш жіберген дейді қордағылар.

Мақұлданған 49 миллиард теңге 5 күннің ішінде банктердегі азаматтардың арнайы есепшотына аударылады. Қазір бұл қаржылық операцияны 4 банк: «Отбасы банк», «Халық банк», «Банк Центр Кредит» және «Алтын банк» жүзеге асырады. Зейнетақы шотынан алынған ақша жеке қолға берілмейді. Егер ол сома 45 күн ішінде пайдаланылмаса, зейнетақы қорына қайтарылады. Ақшаны қайта шешіп алу үшін азаматқа қайтара өтініш жазуға тура келеді.

«Қателік болмау үшін салымшыларымыз, біріншіден, өз есепшотын тексеріп, көз жеткізу керек. Содан кейін ғана уәкілетті оператордың сайтында өтініш береді», - дейді «Бірыңғай жинақтаушы зейнетақы қоры» АҚ департаментінің директоры Қайрат Кенбаев.