"200 мың теңге береді": алматылықтар вакцина салдыру үшін емханаларға кезекке тұрды

Коронавирусқа қарсы қазақстандық вакцинаны салдырғаны үшін 200 мың теңге берілетінін естіген алматылықтар қаладағы емханаларды торуылдап жүр, деп хабарлады paryz.kz. 

"Время" басылымының жазуынша, коронавирусқа қарсы қазақстандық QazCovid-in вакцинасы сынағының үшінші кезеңі желтоқсанда басталды. Қазір 3 мыңға жуық ерікті Алматыдағы №4 қалалық емхана мен санитарлық-эпидемиологиялық сараптама мен мониторинг ғылыми-тәжірибелік орталығында және Тараздағы көпбейінді клиникалық ауруханада вакцинациялаудан өтуде. Екпені дайындап шығарған қазақстандық ғалымдар вакцина салдырғандарға 200 мың теңге берілетінін жариялаған. Оны естіген халық жаппай медицина орталықтарына ағылыпты. 

Алматы тұрғыны Оксана Акулованың сөзінше, бірінші күні емханаға келгенде ондағы халықты көріп, шошып кетіпті. Вакцина алу үшін ұзын-сонар кезекте тұрғысы келмеген ол үйіне кетіп қалып, ертесі күні қайта оралған. 

"Вакцинациялаудан өтуге келгендердің көбі студенттер, басқа емханалардың қызметкерлері екен. Бұған қоса, алматылықтар екпе салдыруға, тіпті, бүкіл отбасымен келіп жүрген көрінеді. Уәде етілген 200 мың теңге бірнеше рет бөлініп беріледі. Бұл - еріктілердің бірінші рет келіп, қайта келмей қоймауы үшін жасалған шара", - дейді ол.  

Еріктілерді тіркеу арнайы бөлмеде орындалады. Вакцинаға жіберлімес бұрын азамат міндетті түрде сараптамадан өтіп, дені сау, бұған дейін коронавируспен ауырмағанын дәлелдеуі керек. 

QazCovid-in вакцинасын жасап шығарған ғалымдардың бірі Білім және ғылым министрлігіне қарасты Биологиялық қауіпсіздік мәселесі комитеті Ұлттық ғылыми-зерттеу институтынының аса қауіпті аурулар зертханасының жетекшісі Лесбек Құтымбетов алғашқылардың бірі болып коронавирусқа қарсы екпені салғызыпты. Ол кезде сынақ әлі жануарларға жүргізіліп жатқан екен. 

"Біз зерттеуші ретінде вакцинаның қалай әсер ететінін білуіміз және коронавирустан қорғану үшін өзімізге екпе салдыруымыз қажет болды. Өйткені біреуміз ауырып қалсақ, зерттеу жұмыстарын тоқтатуға тура келер еді. Вакцинадан кейін еш асқынулар болмады. Тек бастапқыда тері қышу, қалтырау сынды екпенің жалпы жанама әсері байқалды. Біз ғалым ретінде вакцинаның қауіпсіздігіне кепілдік береміз", - дейді зерттеуші. 

Оның айтуынша, ең алғашында 44 адамға, кейіннен тағы 200 азаматқа вакцина салу туралы шешім шыққан. Бұған қоса, ол клиникалық сынамасы Алматы мен Таразда болуы мен неліктен еріктілерге қаржылық сыйыақы ретінде 200 мың теңге беру себебін түсіндірді. 

"Алматы үлкен мегаполис болғандықтан, мұнда еріктілерді табу оңайға соғатынын білдік. Ал Тараз қаласын таңдаған себеп - институт пен вакцина өндіретін зауыттың сол жақта орналасуы. Мемлекеттің бюджеттен бөлген қаражатын есептей келе, еріктілерге 200 мың теңге тағайындауды ұйғардық. Бұдан бөлек, институттың жағдайына қарадық. Ақшалай сыйақы халықты вакцинациялаудан өтуге тартудың амалы болды. Өйтпесек, қажетті адам санын жинай алмайтын едік", - дейді Лесбек Құтымбетов. 

Сонымен қатар, ғалым ерікті уақытылы тексеруден өтіп, 180 күн бойы дәрігердің бақылауында болатынын ескертті. Айтуынша, вакцинаның қорытындылары осы жылдың мамырында белгілі болады екен. 

Еске сала кетсек, бұған дейін Денсаулық сақтау министрі Алексей Цой Қазақстанда вакцина тегін және ерікті түрде болатынын айтқан еді.