Алматыда қаржы пирамидаларына алданғандар президенттен көмек сұрайды

Алматыда "Гарант 24 ломбард", "Еstate ломбард" және "Выгодный займ" қаржы пирамидаларына алданғандар миллиардтаған қаражат кері қайтпай қала ма деп қауіптеніп, президенттен көмек сұрап отыр, деп хабарлады КТК телеарнасы.

Әлі күнге дейін ешкімге де бір тиын қайтарылмады деген зардап шегушілер мыңдаған адамның тағдырына енді президент араша түссе дейді.

"Салған сомам - 3 миллион теңге. Ол үшін банктен несиеге алдым. Отбасым, әпкелерім, апам, ата-анам, достарым бәрі осы компанияға ақша салды. Кім бұл компанияға екі жыл бойы жұмыс істеуге рұқсат берді?  Мемлекет берді. Енді солай бізге де көмектессін. Қалай рұқсат берді осы алаяқтарға, тура солай көмектессін", - дейді Алматы қаласының тұрғыны Ақкенже Ғұмарова.

Махатма Ганди атындағы саябаққа жиналғандар - қаржы пирамидасына бар жиған-тергенін салып, соңынан опық жеген көпшіліктің бір бөлігі ғана. Өйткені жыл басында бар былығы әшкере болған атышулы компаниядан зардап шеккендердің саны 17 мыңнан асып кеткен. Шығын көлемі – 20 миллиард теңге.

"Гарант 24 ломбард", "Еstate ломбард", "Выгодный займ" және "Нур-Али Капитал" серіктестіктерінің басшыларына қатысты қылмыстық іс бойынша сотқа дейінгі тергеп-тексеру өткен айда аяқталды. Барлығы 50 адам күдікке ілінсе, соның 33-і соттың санкциясымен қамалған. Қалған бес күдікті үй қамағына алынса, 12 адам ешқайда кетпеу жөніндегі қолхатпен бостандықта жүр.

"Бұдан басқа 6 күдіктіге іздеу жарияланып, оларға қатысты қылмыстық іс қозғалды. Қылмыстық іс бойынша жәбірленуші және азаматтық талапкер болып танылған барлық азамат қылмыстық іс материалдарымен танысуға Ақтөбе қаласының Жұбановтар көшесі, 271А мекенжайы бойынша Ақтөбе облыстық ПД-не жұмыс күндері сағат 09:00-дан 18:30-ге дейін келе алады", - дейді ІІМ ресми өкілі Нұрділдә Ораз.