Жамбыл облысында марихуана жинағандар ұсталды

Жамбылдық полицейлер автокөліктің жүксалғышынан 3 қап марихуана тапты, деп хабарлады paryz.kz, polisia.kz-ке сілтеме жасап.

25 желтоқсанда Жамбыл облысының ПД Есірткі қылмысына қарсы іс-қимыл басқармасының қызметкерлері жедел-іздестіру шаралары кезінде Меркі-Шу-Бурылбайтал автожолында "ВАЗ-21014" маркалы автокөлігін тоқтатып, оның жүксалғышынан 3 полиэтилен қапты тәркіледі. Қаптардың ішіндегі зат жалпы салмағы 8 келі 600 грамм кептірілген марихуана болып шықты.

Бұл факт бойынша Жамбыл облысының 28 және 31 жастағы екі және Нұр-Сұлтан қаласының 31 жастағы бір тұрғыны ұсталды. Олар Меркі ауданының құмға жақын маңдағы аймақтарында марихуана жинаумен айналысқан.

ҚР ҚК 296-бабының 4-бөлігі ("Аса ірі мөлшердегі есiрткi, психотроптық заттарды, сол тектестерді өткізу мақсатынсыз, заңсыз дайындау, қайта өңдеу, иемдену, сақтау, тасымалдау") бойынша сотқа дейінгі тергеу басталды.

Ұсталғандар өз кінәларын мойындады. Олар Меркі ауданының ПБ уақытша ұстау изоляторына қамалды.