Карантин: эстрада әншілері Ақтөбеге барып, тойдың көрігін қыздырып жүр

Ақтөбе облысы Санитариялық-эпидемиологиялық бақылау департаменті эстарада жұлдыздарын шақырып, корпоративтер өткізген бірнеше кәсіпкерге айыппұл салды. Ал әлеуметтік жауапкершілікті ескермейтін шоу-бизнес өкілдері бұл жолы да жауаптан құтылып кетті, деп хабарлады paryz.kz, arasha.kz-ке сілтеме жасап.

Мейрамханаларды жағалап, адамдарды шектен тыс жинап жүрген эстрада жұлдыздарының қатарында Қайрат Нұртас, Айқын Төлепберген және Бүркіт пен Айша бар.

"Қайрат Нұртас қатысқан шара бойынша "Auz.T" тамақтану желісінің жеке кәсіпкеріне 319 470 теңге көлемінде айыппұл салынды. Кәсіпкер ұжымдық, ойын-сауық іс-шараларын өткізген. Келушілердің де, ұйымдастырушылардың да медициналық маскалары болмаған, адамдар арасындағы әлеуметтік арақашықтық сақтамаған. Сондай-ақ, Айқын Төлепберген қатысқан шара бойынша "Арвана-гранд парк" лаунж-барының заңды тұлғасына қатысты тексеру болды. Тексеру барысында заңды тұлғаның нысанды жеке тұлғаға жалға бергені белгілі болды. Осы объектіге қатысты қайтара жеке тұлғаға тексеру актісі ашылып, жеке тұлға З.Тухмухамбетоваға 41 670 теңге көлемінде айыппұл салынды", – дейді Ақтөбе облысы Санитариялық-эпидемиологиялық бақылау департаментінің баспасөз қызметі.

Қазақстан азаматтарына заңның ортақтығын айтып, әншілердің не себепті жауаптан босау себебін сұраған тілшілерге аймақтағы эпидемиологтар: "Әнші – Алматы қаласының тұрғыны" деп қысқаша қайырды. Ал Бүркіт пен Айша қатысқан мерекелік кешке қатысты тексеру жүргізілетінін айтты. Әншілердің жарнамасы желіде ашық хабарланып жатыр.

Қазіргі уақытта ақтөбелік эпидемиологтар шектеу карантиндік шараларын бірнеше рет бұзған 13 нысанның қызметін тоқтату үшін әкімшілік сотқа жүгінген.