Түркістанда жолаушы такси жүргізушілерінің атынан несие алған

Түркістан қаласының полиция басқармасына жергілікті тұрғын өтініш білдірді. Жәбірленушінің айтуынша, оның атынан белгісіз біреу 900 мың теңгеден астам сомаға несие ресімдеген.

Бір айдан кейін банктен қарызды төлеу туралы хабарлама келгенде, ер адам барлық жағдайларды анықтау үшін тәртіп сақшыларынан көмек сұрады. Бұл фактіні полицейлер ҚР ҚК-нің 190-бабы "Алаяқтық" бойынша тіркеді.

Мұқият жүргізілген жұмыстың нәтижесінде полиция күдіктіні анықтады. Күдікті түркістандық жұмыссыз жігіт екені айқын болды.

"Ол таксиге отырып, жүргізушілерден қоңырау шалу үшін ұялы телефон сұрады. Содан кейін атынан несие алған. Жігіттің алаяқтық бойынша 5 фактіге қатысы бар екені анықталды. Жәбірленушіге келтірілген залал сомасы – шамамен 6 млн теңге", – деп хабарлады полиция.

Қазіргі уақытта күдіктіге қатысты сотқа дейінгі тергеу жүргізілуде және алаяқтың осыған ұқсас қылмыстарға қатысы анықталуда.